Müasir dövrdə informasiya və kommunikasiya texnologiyalarının ən böyük töhfə verdiyi sahələrdən biri də təhsildir. Təhsildə yeni texnologiyaların tətbiqi həm tədris prosesinin keyfiyyətini yüksəldir, həm də şagirdlərə informasiya kommunikasiya texnologiyalarının mənimsədilməsi üçün şərait yaradır.
Bu gün muxtar respublikanın ümumtəhsil məktəblərində də informasiya kommunikasiya texnologiyalarından istifadəyə geniş yer verilir. Hazırda ümumtəhsil müəssisələrində 5700-dən çox komputer, 700-dən çox elektron lövhə quraşdırılmış, fənn kabinələri müasir avadanlıqlarla təchiz edilmişdir.
Məktəblərdə müasir tədris vasitələrindən istifadə müəllimlərin daim bu sahədə bilik və bacarıqlarının yüksəldilməsini tələb edir. Naxçıvan Muxtar Respublikası Təhsil Nazirliyi tərəfindən təhsilverənlərin informasiya kommunikasiya texnologiyaları üzrə bacarıqlarının yüksəldilməsi üçün tədbirlər görülür, onlar üçün ixtisasartırma kurslar təşkil olunur.
Naxçıvan Şəhər Peşə Liseyində təşkil olunan kurslara 40 müəllim cəlb olunub. 1 ay davam edəcək kursda müəllimlərə komputer texnologiyasının əsasları, sistem proqram təminatı, İKT proqramları, tətbiqi proqramlar, eləcə də “Smart Notebook” proqramı və komputer, proyektor və elektron lövhə arasında əlaqə fənləri öyrədiləcək.
Kursların təşkilində məqsəd müəllimlərin peşəkarlıq səviyyəsinin artırılması, təlim texnologiyaları və müasir təlim üsullarının tətbiqi sahəsində onların bilik və bacarıqlarının inkişaf etdirilməsidir.
Kursları uğurla bitirən müəllimlərə sertifikatlar veriləcək.
