İyulun 18-də Naxçıvan Muxtar Respublikası Təhsil Nazirliyinin təşkilatçılığı ilə muxtar respublikanın ümumtəhsil məktəblərinin gənc müəllimləri arasında muxtar respublika birinciliyi keçirilib.Birinciliyin açılış tədbirində Naxçıvan Muxtar Respublikası Şahmat Mərkəzinin direktoru Emin Hacıyev bildirib ki, 1924-cu ilin iyulun 20-də Fransanın paytaxtı Parisdə FİDE təsis edilmişdir. 20 iyul- 1966-ci ildən Beynəlxalq Şahmat Günü kimi qeyd edilir. Qeyd olunub ki, bu gün muxtar respublikamızda şahmatın inkişafı daim diqqət mərkəzindədir, bu idman növünün kütləvi hal alması üçün aparılan siyasət uğurla davam etdirilir. Muxtar respublikamızın şəhər və rayonlarında şahmat məktəbləri müasir tələblərə cavab verəcək səviyyədə tikilərək isitifadəyə verilib.
Naxçıvan Muxtar Respublikası Təhsil Nazirliyi Aparatının sektor müdiri Rasim Rüstəmov çıxış edərək, qeyd edib ki, ölkəmizdə eləcədə, muxtar respublikamızda təhsilə böyük diqqət və qayğı göstərilir. Bu qayğıdan pay sahibi olan şahmatıda xüsusilə qeyd etmək lazımdır. Belə ki məktəblərimizdə şahmat I-IX siniflərdə bir fənn kimi tədrisi edilir. Həmçinin muxtar respublikamızın quruculuq çoğrafiyasında şahmat mərkəzi və rayonlarda şahmat məktəbləri mühüm yer tutur. Yaradılan bu infrastruktur nəticəsində gələcəyin güclü şahmatçıları hazırlanır.
Sonra birinciliə start verilib. Ümumtəhsil məktəblərindən 40 müəllimin iştirak etdiyi şəxsi birincilik İsveçrə sistemi üzrə keçirilib və oyun 5 turdan ibarət olub.
Birincilikdə qadınlar üzrə I yerə Nərmin İsmayılova, II yerə Fəridə Şükürova, III yerə Gülnar Bayramova, kişilər arasında isə I yerə Turan Qasımov, II yerə Hüseyn Həsənov, III yerə Vüsal Məmmədov çıxıb.
Qaliblərə Naxçıvan Muxtar Respublikası Təhsil Nazirliyinin diplomları təqdim olunub.
