STEAM-məntiqi düşüncə proseslərinə və problem həllinə diqqət yetirmək, şagirdlərin hər sahədə uğur qazanmasına kömək edəcək zehni vərdişləri inkişaf etdirməyə imkan verir. Bu təhsil metodu şagirdlərdə informasiya-kommunikasiya texnologiyaları və elmi biliklərin inkişafına dəstək olmaq, onlarda kodlaşdırma və vizuallaşdırmaya marağı artırmağa təsir edən başlıca amildir.
STEAM üzrə keyfiyyətli tədrisi təmin etmək üçün vahid mərkəzdən STEAM təhsilinin aktual mövzularına həsr olunan interaktiv dərslər təşkil olunur. Naxçıvan Muxtar Respublikası Təhsil Nazirliyi tərəfindən ötən ildə keçirilən interaktiv dərslərin şagirdlərdə STEAM dərslərinin daha yaxşı mənimsədilməsində böyük əhəmiyyəti olmuş və bunun davamı olaraq 2022-2023-cü tədris ilində hazırlanmış qrafikə uyğun olaraq oktyabrın 20-də muxtar respublikanın ümumtəhsil məktəblərinin VI və VII siniflərində təhsil alan şagirdlər üçün STEAM təhsili ilə bağlı növbəti interaktiv dərs təşkil olunmuşdur. Artıq ənənə halını almış interaktiv dərs Naxçıvan şəhər Heydər Əliyev adına tam orta məktəbdə yaradılan STEAM Tədris Mərkəzində keçirilib. Təhsil Nazirliyinin təlimçisi Ceyran Məmmədova tərəfindən keçirilən interaktiv dərsdə STEAM təhsilinin mahiyyəti və sadə modellərin hazırlanması haqqında məlumat verilib. Dərsdə “Tinkercad” proqramı ilə tanış olunmuş və sadə modellərin hazırlanması öyrədilmişdir.İnteraktiv dərs muxtar respublikanın STEAM təhsil metodu tətbiq edilən 100-dən artıq təhsil müəssisəsində izlənilib.
