STEAM təhsil metodu şagirdlərə şəxsiyyətyönümlü inkişafın aşılanmasında əvəzsiz xidmət edir, şagirdlərdə şəxsiyyətin formalaşmasının bir hissəsi kimi tədqiqatçılıq, səbrlilik, nizamlılıq, uzaqgörənlik, əməkdaşlıq hissini inkişaf etdirir. Bu metoddan istifadə zamanı şagirdlər maket və ya qurğu hazırlayarkən müxtəlif elmi sahələrin vəhdətini təşkil edən biliklər əldə etməklə yanaşı, həm də praktik bacarıq və vərdişlərə yiyələnirlər.
Şagirdlərdə bu vaxta qədər öyrəndiklərinə müxtəlif cür yanaşmaq və yaratmaq bacarıqlarını inkişaf etdirmək məqsədilə Naxçıvan Muxtar Respublikası Təhsil Nazirliyi tərəfindən hazırlanmış qrafikə uyğun olaraq noyabrın 23-də muxtar respublikanın ümumtəhsil məktəblərinin VI və VII siniflərində təhsil alan şagirdlər üçün STEAM təhsili ilə bağlı növbəti interaktiv dərs təşkil olunub. İnteraktiv dərs Naxçıvan şəhər Heydər Əliyev adına tam orta məktəbdə yaradılan STEAM Tədris Mərkəzində keçirilib. Təhsil Nazirliyinin təlimçisi Mirhəsən Tahirov tərəfindən keçirilən dərsdə Makecode interfeysi ilə proqramlaşdırmada kod bloklarından istifadə haqqında məlumat verilib. Müxtəlif layihələrin kodlaşdırılması və ekranda simulyasiya vasitəsi ilə elektron qurğular üzərində işləməyin yolları izah edilmişdir. Qeyd edək ki, interaktiv dərs muxtar respublikanın STEAM təhsil metodu tətbiq edilən 112 təhsil müəssisəsində izlənilib.
