Təşkil olunan Bijuteriya kursuna bu sahəyə marağı olan sağlamlıq imkanları məhdud 12 qız uşağı cəlb edilib. Kurs müddətində iştirakçılara bijuteriya sənətində müxtəlif növ ip, parça, muncuq, pilək və digər bədii materiallardan istifadə etməklə boyunbağı, bilərzik, sırğa, kəmər və başqa bəzək əşyalarının hazırlanmasının bədii texnikası öyrədilib. Kurs Heydər Əliyev Uşaq-Gənclər Yaradıcılıq Mərkəzinin bijuteriya dərnəyinin rəhbəri Röya Fərəcova tərəfindən aparılıb.
Kursun sonunda iştirakçılar Bijuteriya sənəti haqqında məlumat alaraq bu sənətin sirlərini, işlənmə üslubunu və ən əsası sərbəst qaydada yaradıcılıq qabiliyyətlərini inkişaf etdirməyi öyrəniblər.
Dövlət Proqramına müvafiq olaraq Mərkəzdə həmçinin 3 Dekabr Beynəlxalq Əlillər Günü ilə bağlı sağlamlıq imkanları məhdud dərnək üzvlərinin əl işlərindən ibarət sərgi də keçirilmişdir. Mərkəzin Dulusçuluq, Aplikasiya, Bədii tikmə, Rəsm, Ağac üzərində yandırma, Bijuteriya, Bədii qiraət, Bacarıqlı əllər, Qum sənəti və Ebru sənəti dərnəklərində olan sağlamlıq imkanları məhdud dərnək üzvlərinin fəaliyyəti canlı nümayiş olunmuşdur. Sərgidə 14 sağlamlıq imkanı məhdud dərnək üzvü iştirak etmişdir.
Tədbirin sonunda dərnək üzvləri diplom və hədiyyələrlə mükafatlandırılıblar.
