Naxçıvan Muxtar Respublikası Təhsil Nazirliyinin təşkilatçılığı ilə dərsliklərin təkmilləşdirilməsi istiqamətində VIII və XI siniflər üzrə Coğrafiya dərsliklərinin müzakirəsi keçirilib. Heydər Əliyev adına tam orta məktəbdə keçirilən müzakirədə ümumtəhsil məktəblərinin qabaqcıl müəllimləri, muxtar respublikanın ali təhsil ocaqlarının professor və müəllim heyəti, bu ixtisas üzrə təhsil alan tələbələr iştirak edib.Müzakirədə iştirak edən Naxçıvan Muxtar Respublikası Təhsil Nazirliyi Aparatının şöbə müdiri Abdulla Əsgərov bildirib ki, dərsliklərimiz istər məzmun, istər üslub, istərsə də dizayn baxımından ilbəil təkmilləşir. Dərsliklərin çapdan öncə müzakirəyə çıxarılması da mövcud çatışmazlıqların aşkarlanmasına kömək edir. Təhsil Nazirliyi də buna uyğun olaraq ali təhsil müəssisələri ilə qarşılıqlı əməkdaşlıq çərçivəsində muxtar respublikanın ali təhsil müəssisələrinin professor-müəllim heyəti, ümumtəhsil məktəblərinin qabaqcıl fənn müəllimləri, həmçinin pedaqoji profilli ixtisaslarda təhsil alan sonuncu kurs tələbələrinin iştirakı ilə 2023-2024-cü tədris ili üçün yenidən nəşr olunacaq dərsliklərin müzakirəsini həyata keçirir.
Bildirilib ki, müzakirələrin sonunda hazırlanacaq rəy və təkliflər həmin dərsliklərin təkmilləşdirilməsinə öz töhfəsini verəcəkdir.
Daha sonra dərsliklərin müzakirəsi keçirilib. Müzakirələrin gedişində iştirakçılar dərsliklər ilə bağlı öz fikir və təkliflərini bölüşüblər.
Qeyd edək ki, müzakirələrdən sonra yekun təkliflər hazırlanaraq Naxçıvan Muxtar Respublikası Təhsil Nazirliyinə təqdim olunub.
