Görüşdə Təhsil Nazirliyi Aparatının baş məsləhətçisi Sahil Əlizadə təcrübəçi tələbələrin diqqətinə çatdırıb ki, nazirlik tərəfindən müəllimlərin bilik və bacarıqlarının artırılması məqsədi ilə mütəmadi olaraq kurslar, seminarlar və digər maarifləndirici tədbirlər təşkil olunur. “Sabahın müəllimi” layihəsi çərçivəsində təşkil olunacaq təlimlərdə də nazirliyin əməkdaşları və Naxçıvan Gənc Müəllimlər Assosiasiyasının təlimçiləri tərəfindən təcrübəçi tələbələrə müəllimlərin işə qəbulu müsabiqəsinin qiymətləndirmə çərçivəsinə uyğun olaraq onların hüquqi savadlılığının artırılması, fənn kurikulumlarının tətbiqi, pedaqoji və psixoloji kompetensiya mövzularında məlumatlar veriləcək.
Tədbirdə Naxçıvan Gənc Müəllimlər Assosiasiyasının sədri Gülxanım Orucovanın “Müasir müəllim necə olmalıdır”, Naxçıvan Şəhər Təhsil Şöbəsinin metodkabinet müdiri Gülxarə Tarverdiyevanın “Layihə çərçivəsində keçiriləcək təlimlər”, Şahbuz Rayon Ağbulaq kənd tam orta məktəbinin ingilis dili müəllimi, prezident təqaüdçüsü Nigar Mirzəməmmədovanın “Müəllim nümunəsi” mövzularında çıxışları dinlənilib.
Qeyd edək ki, 6 mart -29 may tarixləri arasında təşkil olunacaq təlimlərdə Naxçıvan Dövlət və “Naxçıvan” univeristetlərinin, Naxçıvan Müəllimlər İnistitutunun sonuncu kurslarında pedaqoji profilli ixtisaslarda təhsil alan və ümumi təhsil müəssisələrində təcrübə keçən 700-dən artıq tələbənin iştirakı nəzərdə tutulub. Təlimi uğurla başa vuran tələbələrə “Sabahın müəllimi” layihəsi iştirakçısı sertifikatı təqdim olunacaq.
