2023-2024-cü tədris ilində muxtar respublikanın ümumtəhsil məktəblərinə 2597 uşaq məktəbəhazırlıq qruplarına qəbul olunub və bu gündən məşğələlərə başlanılıb. Bu qruplara qəbul üçün qeydiyyat mektebeqebul.edu.az elektron sistemi üzərindən həyata keçirilib. Dövlət ümumtəhsil məktəblərində yaradılmış məktəbəhazırlıq qruplarına 5 yaşı həmin il tamam olmuş uşaqlar qəbul olunublar. Azərbaycan bölməsi üzrə məktəb və müəllim seçimi 11 avqustdan, tədris digər dillərdə aparılan bölmələr üzrə məktəb və müəllim seçimi isə 15 avqustan aktiv edilib. Muxtar respublikanın ümumtəhsil məktəblərinə 168 sinif kompleksində 2597 uşaq qeydiyyatdan keçib ki, onların 1449 oğlanlar 1148 isə qızlardır.
Məktəbəhazırlıq qrupları üçün kənd məktəblərində 8-10 arası, şəhər və qəsəbələrdə isə 15-dən artıq uşaq olan məktəblər seçilib. Qruplarda gün ərzində 3, həftədə 4 gün olmaqla 12 məşğələ keçiriləcək. Bir məşğələnin müddəti 30 dəqiqə, məşğələlərarası fasilə 10 dəqiqə olacaq.Məktəbəhazırlıq qruplarında “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi”, “Fiziki mədəniyyət” məşğələləri keçirilir. Dərs ili iki yarım ilə bölünür və mayın 31-də başa çatacaq.
Qeyd edək ki, məktəbəhazırlıq qruplarının yaradılmasında məqsəd 5 yaşlı uşaqların məktəb təliminə hazırlığı ilə əlaqədar psixoloji dayanıqlığını artırmaq, ünsiyyət və birgə fəaliyyət bacarıqlarına yiyələnməsini təmin etmək, onları əhatə olunduqları aləmə və təhsil mühitinə uyğunlaşdırmaqdır.
Məktəbəhazırlıq qruplarına elektron qəbul muxtar respublikanın ümumtəhsil məktəbləri üçün 2021-ci ildən aparılır. Ötən tədris ilində 2853 uşaq məktəbəhazırlıq qruplarına qəbul olunmuşdu.
