Noyabrın 13-dən Naxçıvan Muxtar Respublikası Təhsil Nazirliyinin təşkilatçılığı ilə ümumi təhsil müəssisələrində STEAM tədris edən müəllimlər üçün STEAM Təlim –Tədris Mərkəzində təlimlərə başlanılıb.Təhsil Nazirliyinin təlimçi-mütəxəssisləri Fuad Babayev, Ceyran Məmmədova, və Ələkbər Əliyev tərəfindən keçirilən təlimdə müəllimlərə proqram əsasında STEAM təhsilinin mahiyyəti, "STEAM metodologiyaları", "Arduino”, “Mikrobit”, "Robototexnika", "3D modelləşdirmə" və "3D çap modulları" ilə bağlı geniş məlumatlar verilir. Həmçinin təlimlər çərçivəsində müəllimlərə STEAM düşüncəsi və metodikası, fənlərarası əlaqə, layihə əsaslı öyrənmə, innovativ təlim metodikaları və digər bu kimi istiqamətlərdə praktik biliklər aşılanır. Təlimlərdə müəllimlər STEAM dərslərində istifadə olunan müasir avadanlıqlarla tanış olur, müxtəlif tapşırıqlar yerinə yetirərək yeni cihazların iş prinsipi və müxtəlif layihələrdə tətbiqi üsullarını öyrənirlər.
Təlimin təşkil olunmasında əsas məqsəd STEAM dərslərini tədris edəcək müəllimləri müvafiq istiqamətdə peşəkar inkişafa sövq etmək, onlarda XXI əsr bacarıqlarının - yaradıcı və bədii düşüncə, əməkdaşlıqetmə, həmçinin ünsiyyətin inkişaf etdirilməsi, müxtəlif proqramlaşdırma dillərini tətbiq etməklə innovativ texnologiyalardan istifadə qabiliyyətinin yüksəldilməsindən ibarətdir.
71 müəllimin cəlb olunduğu təlim dekabrın 28-nə kimi davam edəcək və təlimi müvəffəqiyətlə bitirən müəllimlər sertifikatla təmin olunacaqlar.
