Yanvarın 16-da Naxçıvan Muxtar Respublikası Təhsil Nazirliyinin təşkilatçılığı ilə ümumtəhsil məktəblərində gənclərin çağırışaqədərki hazırlığı fənlərini tədris edən hərbi rəhbərlərləri ilə “2022-2023-cü tədris ilində muxtar respublikanın ümumtəhsil məktəblərindən Heydər Əliyev adına Hərbi Liseyə və xüsusi təyinatlı təhsil müəssisələrinə sənəd vermə, qəbul və qarşıda duran vəzifələr”lə bağlı görüş keçirilib.Görüşdə əvvəlcə ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib və dövlət himni səsləndirilib. Naxçıvan Muxtar Respublikası Təhsil Nazirliyi Aparatının baş məsləhətçisi Elxan Babayev iştirakçıların diqqətinə çatdırıb ki, bu gün muxtar respublikada şagirdlərin təhsili ilə yanaşı, onların hərbi vətənpərvərlik ruhunda tərbiyə olunması da diqqət mərkəzində saxlanılır. Bildirilib ki, şagirdlərin hərbi hazırlığının və vətənpərvərlik tərbiyəsinin yüksəldilməsində “Gənclərin çağırışaqədərki hazırlığı” fənnini tədris edən hərbi rəhbərlərin üzərinə böyük vəzifə düşür. Qeyd olunub ki, bu məqsədlə də çağrışaqədərki hazırlıq fənnini tədris edən hərbi rəhbərlərin yeni təlim metodlarından istifadə bacarıqlarının və dərslərə yaradıcılıqla yanaşılması vərdişlərinin təkmilləşdirilməsi məqsədi ilə təlim toplantılar keçirilir.
Vurğulanıb ki, “Gənclərin çağırışaqədərki hazırlığı” fənninin tədrisi şagirdlərin milli mənlik və vətənpərvərlik ruhuda böyüməsində mühüm rol oynayır. Elə bu məqsədlə də ümumtəhsil məktəblərində hərbi hazırlıq dərslərinə mühüm əhəmiyyət verilir. Bunun nəticəsidir ki, son illər gənclər arasında hərbi təhsilə maraq da xeyli artmışdı. Belə ki, 2023-ci tədris ilində muxtar respublikanın ümumtəhsil məktəblərindən Heydər Əliyev adına Hərbi Liseyə 45, Xüsusi təyinatlı məktəblərə isə 20 şagird qəbul olunmuşdur. Qeyd olunub ki, gənclərin çağırışaqədərki hazırlığı fənninin tədrisi səviyyəsinin yüksəldilməsi, məktəblilərin bu fənnə maraqlarının artırılması, onların vətənpərvərlik ruhunun yüksəldilməsi üçün Təhsil Nazirliyi tərəfindən müharibə iştirakçıları və qazilərin ümumtəhsil məktəblərinə hərbi rəhbər vəzifələrə təyini də diqqət mərkəzində saxlanılır. Bildirilib ki, son dövrlərdə hərbi rəhbər vəzifələrinə 17 qazi və müharibə iştirakçısı təyin olunub ki, onlardan 3-nün işə qəbulu oktyabr- yanvar aylarına təsadüf edir.
Tədbirdə Səfərbərlik və Hərbi Xidmətə Çağırış üzrə Dövlət Xidmətinin Naxçıvan Muxtar Respublikası üzrə baş idarəsinin şöbə rəisi polkovnik-leytenant Vüsal Əliyevin, “Naxçıvan Dövlət Universitetinin magistratura və doktorantura mərkəzinin direkoru, Çapay Quliyevin, Heydər Əliyev adına Hərbi Liseyin kadrlar bölmə rəisi polkovnik-leytenant Fuad Eyvazovun və Naxçıvan Qaziləri “İctimai Birliyi sədrinin müavini, Şərur rayon Kürkənd tam orta məktəbinin hərbi rəhbəri, qazi Əli Əlisoyun çıxışları dinlənilib.
Görüşdə 2022-2023-cü tədris ilində muxtar respublikanın ümumtəhsil məktəblərindən Heydər Əliyev adına Hərbi Liseyə və xüsusi təyinatlı təhsil müəssisələrinə sənəd vermə, qəbul və digər məsələlərin də müzakirəsi aparılıb, yeni təyin olunan hərbi rəhbərlərə tədrisin təşkili ilə bağlı tapşırıq və tövsiyyələr verilib, iştirakçıları maraqlandıran suallar cavablandırılıb.
