Muxtar respublikanın ümumtəhsil məktəbləri ilə Heydər Əliyev Muzeyi arasında “Qurtuluşdan başlanan yol” mövzusunda interaktiv dərs keçirilib. Dərs muxtar respublikanın 200-dən çox təhsil müəssisəsində izlənilib.
İnteraktiv dərsi AMEA-nın müxbir üzvü, tarix üzrə elmlər doktoru, professor Fəxrəddin Səfərli aparıb. Qeyd edib ki, ötən əsrin 90-cı illərinin əvvəllərində ölkəmiz ağır vəziyyətə düşmüş, müstəqilliyini itirmək təhlükəsi ilə qarşı-qarşıya qalmışdı.

Məhz belə bir taleyüklü məqamda Azərbaycan xalqı öz gələcəyini görkəmli dövlət xadimi Heydər Əliyevə etibar etdi. Xalqın təkidi ilə Bakıya qayıdan ümummilli lider1993-cü il iyunun 15-də Azərbaycan Ali sovetinin sədri seçildi. Beləliklə 15 iyun Azərbaycan tarixinə Milli Qurtuluş Günü kimi daxil oldu. Ulu öndər Heydər Əliyevin xilaskarlıq missiyası nəticəsində Azərbaycanın dövlət müstəqilliyini təhdid edən proseslərin qarşısı alındı və əsas diqqət dövlət quruculuğu məsələlərinə yönəldildi.
Sonra Heydər Əliyev muzeyinin direktoru Ramil Orucəliyev ümummilli liderimizin ictimai-siyasi fəaliyyəti, keçdiyi şərəfli həyat yolu ilə bağlı muzeydə qorunan nadir tarixi sənədlər, elmi nəşrlər və xatirə əşyaları haqqında şagirdlərə  məlumat verib.