Naxçıvan Muxtar Respublikası Təhsil  Nazirliyinin təşkilatçılığı ilə 15 sentyabr Bilik günü münasibətilə Gözdən Əlil Uşaqlar Üçün Xüsusi İbtidai Məktəbdə təhsil alan şagirdlərə məktəbli forması və dərs ləvazimatları verilib.

Tədbirdə Naxçıvan Muxtar Respublikası Təhsil  Nazirinin müavini Heyran Əhmədova bildirib ki, Naxçıvan Muxtar Respublikası Ali Məclisi Sədrinin 11 yanvar 2016-cı il tarixli Sərəncamı ilə təsdiq olunmuş “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası nəticəsində bu kateqoriyadan olan uşaqların təhsilə cəlbi sistemli xarakter alıb. Vurğulanıb ki, ötən dövr ərzində sağlamlıq imkanları məhdud uşaqlar məktəbəqədər, ümumtəhsil, məktəbdənkənar təhsil müəssisələrinə cəlb edilib.

Muxtar respublikada audio və elektron kitabxana xidmətləri,  Distant Tədris Mərkəzi yaradılıb, görmə qabiliyyəti məhdud uşaqlar üçün brayl kursları təşkil edilib.  Qeyd olunub ki, sosial qayğıya ehtiyacı olan uşaqların məktəbli forması və dərs ləvazimatları ilə təminatı diqqətdə saxlanılıb. 2019-2020-ci tədris ili ilə bağlı  bu kateqoriyadan olan 370 şagird məktəbli forması və dərs ləvazimatları ilə təmin olunub.

Sonra Gözdən Əlil Uşaqlar Üçün Xüsusi İbtidai Məktəbdə təhsil alan 9 şagirdə məktəbli forması və dərs ləvazimatları təqdim edilib.

Tədbirdə iştirak edən valideynlər və müəllimlər göstərilən diqqət və qayğıya görə minnətdarlıqlarını bildiriblər.