Naxçıvan Müəllimlər İnstitutunda Təbiət və incəsənət fakültəsinin Təhsildə sosial-psixoloji xidmət və Təsviri incəsənət müəllimliyi ixtisasları üzrə IV kurs tələbələrinin pedaqoji təcrübəsinin başlanğıc konfransı keçirilmişdir. Konfransda pedoqoji təcrübəyə yola salınan təhsildə sosial-psixoloji xidmət ixtisası üzrə 26 tələbə, təsviri incəsənət müəllimliyi ixtisasları üzrə 27 tələbə, ümumilikdə 53 tələbə iştirak etmişdir. Məlum olmuşdur ki, tələbələr Naxçıvan şəhərində yerləşən 8, 11, 12, və 14 nömrəli ümumtəhsil orta məktəblərində 8 həftəlik pedaqoji təcrübə keçəcəklər. Konfransı giriş sözü ilə institutun prorektoru, dosent Azad Novruzov açaraq pedaqoji təcrübənin təşkili ilə bağlı görülmüş işlər və qarşıda duran vəzifələr haqqında geniş məlumat vermişdir.

Sonra Naxçıvan Muxtar Respublikası Təhsil Nazirinin müavini Ovni Muradov pedaqoji təcrübənin keçiriləcəyi məktəblərin şəraitindən, müasir texnologiyalarla təminatından söhbət açmışdır. İnstitutun təcrübə rəhbəri Təranə Əliyeva pedaqoji təcrübədə iştirak edəcək metodistlər, təcrübə rəhbərləri və təcrübəçi tələbələrin təcrübə müddətində görəcəkləri işlər haqqında ətraflı məlumat vermişdir. Təbiət və incəsənət fakültəsinin dekanı, dosent Rövşən Vəliyev isə pedaqoji təcrübə müddətində təcrübəyə nəzarət mexanizmindən danışmış, tələbələrin məktəblərdə mövcud qaydalarına ciddi yanaşmalarının zəruriliyini vurğulamışdır. Konfransın yekununda pedaqoji təcrübəyə başlayan tələbələrin sualları cavablandırılmış, onlara zəruri izahat və tövsiyyələr verilmişdir.