28-29 noyabr 2019-cu il tarixlərdə Bakı şəhərində Peşə Təhsili üzrə Dövlət Agentliyi və Avropa İttifaqının Azərbaycandakı Nümayəndəliyi ilə əməkdaşlıq çərçivəsində "Azərbaycanda təhsil və təlimlə bağlı inkişaf prosesləri: Aİ-nin "Təhsilə yardım proqramı"nın icrası, o cümlədən 2018-2020-ci illərin Turin Prosesinin nəticələrinin təqdim olunması və paylanması ilə bağlı təcrübələrin paylaşılması" adlı seminar keçirilmişdir.

Seminarda Azərbaycan Respublikası Təhsil Nazirliyinin, Əmək və Əhalinin Sosial Müdafiəsi Nazirliyinin, Azərbaycan Sahibkarlar Konfedarasiyasının rəsmi şəxlərinin eləcə də Naxçıvan Muxtar Respublikası Təhsil Nazirliyinin Orta ixtisas təhsili müəssisələri və peşə məktəbləri ilə iş üzrə şöbənin baş məsləhətçisi Elnur Qasımov və Naxçıvan Şəhər Peşə Liseyinin direktoru Vüsal Abdullayev iştirak etmişdir.

Ekspertlər səviyyəsində Avropa İttifaqının (Aİ) "Azərbaycanda Peşə Təhsili və Təlimi (PTT) Mərkəzlərinin müasirləşdirilməsi" proqramı çərçivəsində həyata keçirilən qrantlar üzrə nailiyyətlər və gələcəkdə görüləcək tədbirlərlə bağlı tövsiyələr, eyni zamanda "Turin Prosesi 2018-2020"nin nəticələrinin plenar müzakirəsi aparılmışdır.

Eyni zamanda muxtar respublikadan gedən nümayəndələr tərəfindən tədbir iştirakçilarına Naxçıvanda təhsilin bu sahəsinə göstərilən qayğı, yaradılan şərait, muxtar respublikanın yerli şəraitinin və əmək bazarının tələbləri nəzərə alınmaqla, qəbul olunmuş peşə ixtisasları, bu sahənin inkişafı istiqamətində qəbul olunan və icrası davam etdirilməkdə olan dövlət proqramları haqqında məlumat verilmişdir.