Naxçıvan Muxtar Respublikası Gənclər və İdman, Təhsil nazirlikləri və Basketbol Federasiyasının təşkilatçılığı ilə məktəblilər arasında keçirilən basketbol üzrə muxtar respublika çempionatına yekun vurulub.

Birinciliyin keçirilməsində əsas məqsəd məktəblilərin fiziki sağlamlığının və idman vərdişlərinin artırılması, ümumtəhsil məktəblərinin idman sahəsində sinifdənxaric və məktəbdənkənar fəaliyyətlərinin qiymətləndirilməsi, məktəblilər arasında idman və dostluq əlaqələrinin möhkəmləndirilməsi və onların asudə vaxtlarının səmərəli təşkilidir.

Yarışda IX-X siniflərdə oxuyan 2004-2005-ci il təvəllüdlü oğlan və qızlardan ibarət komandalar mübarizə aparıb. Naxçıvan şəhərindəki İlham Əliyev adına Olimpiya İdman Komleksində final görüşləri keçirilib.

Qızlar arasında keçirilən final qarşılaşmasında Ordubad məktəbliləri Culfalı həmkarlarından üstün olublar. Naxçıvan komandası isə çempionatın üçüncüsü olub.

Oğlanlar arasında oynanılan oyunların nəticəsinə əsasən finalda Naxçıvan və Culfa komandaları qarşılaşıb. Görüş Naxçıvan təmsilçisinin qələbəsi ilə başa çatıb – 55:21. Ordubad komandası isə üçüncü olub.

Sonda qaliblər təşkilatçılar tərəfindən diplom və kubokla mükafatlandırılıblar. Mükafatları Gənclər və İdman naziri Azad Cabbarov, Təhsil naziri Rəhman Məmmədov və Basketbol Federasiyasının sədri Mahir Əliyev təqdim ediblər.