Naxçıvan Muxtar Respublikası Təhsil Nazirliyi və Rəssamlar Birliyinin birgə təşkilatçılığı ilə “Məktəblilərin təsviri və dekorativ-tətbiqi sənət  müsabiqəsi” başlayıb.  Müsabiqə yanvarın 8-dən 24-dək  muxtar respublikanın  bütün  şəhər və rayon ümumtəhsil  məktəblərinin  şagirdləri arasında nəzərdə tutulub. İlk olaraq Heydər Əliyev Uşaq-Gənclər Yaradıcılıq Mərkəzində  Naxçıvan Şəhər Təhsil Şöbəsinin  tabeliyində olan ümumtəhsil  məktəblərinin şagirdləri arasında keçirilib.

Müsabiqədə “Naxçıvan dünən və bu gün”, “Naxçıvan abidələri”, “Müasir Naxçıvan”, “Naxçıvan Muxtar Respublikası -95 ” mövzularında müxtəlif  əl işləri ilə 116 şagird  iştirak edib.  Münsiflər heyəti tərəfindən 5 ballıq sistemə uyğun qiymətləndirmə aparılıb. Təsviri və dekorativ-tətbiqi sənət müsabiqəsi üzrə 5 həvəsləndirici yer olmaqla  ümumilikdə  22 qalib  müəyyənləşdirilib. Qaliblərə təşkilatçılar tərəfindən  diplomlar təqdim olunub.

Qeyd edək ki, I, II və III yerin qalibləri muxtar respublika mərhələsinə vəsiqə qazanıb.