23 yanvar 2020-ci il tarixdə Kəngərli Rayon Təhsil Şöbəsinin təşkilatçılığı ilə şagirdlərin asudə vaxtının səmərəli təşkili, onlarda fəallığı artırmaq, maraqlarını müəyyənləşdirmək məqsədilə Qarabağlar kənd 1 və 2 nömrəli tam orta məktəblərin şagirdlərinin Qarabağlar Türbə Kompleksinə ekskursiyası təşkil olunub. Ekskursiyada 36 şagird iştirak edib.

Məktəblilərə məlumat verilib ki, Naxçıvan Muxtar Respublikası Ali Məclisi Sədrinin “Qarabağlar Türbə Kompleksinin bərpası və tədqiq olunması haqqında” 2016-cı il 4 iyul tarixli Sərəncamına uyğun olaraq Kəngərli rayonunun Qarabağlar kəndindəki türk-islam mədəniyyətinin nadir nümunələrindən olan Qarabağlar Türbə Kompleksi də elmi və tarixi əsaslarla bərpa edilib.

Bildirilib ki, kompleksin xanəgah hissəsində xalqımızın həyat tərzini əks etdirən qədim məişət əşyaları, ərazidə aparılan arxeoloji qazıntılar zamanı tapılan maddi-mədəniyyət nümunələrindən ibarət eksponatlar nümayiş etdirilir. Qarabağlar Türbə Kompleksinin bərpadan əvvəl və bərpadan sonra çəkilmiş fotoşəkilləri, o cümlədən kətan üzərində yağlı boya ilə işlənmiş “Qarabağlar türbəsi” rəsmləri, Naxçıvanın tarixini və Qarabağlar Türbə Kompleksi haqqında məlumatları özündə əks etdirən kitablar eləcə də binadakı qədim təndirlər, mis qablar, XII-XVII əsrdə istifadə olunan qədim mis və gümüş sikkələr məktəblilər tərəfindən maraqla qarşılanıb.

Komplekslə tanışlıq şagirdlərin marağına səbəb olub və onlarda zəngin təəssürat yaradıb.