Məktəblilərə əmək vərdişləri aşılamaq, sənət və peşələrlə ilkin tanışlıq, daxili bazarın tələbatının dolğun ödənilməsində görülən genişmiqyaslı işlərlə tanışlıq məqsədilə Naxçıvan Muxtar Respublikası Texniki Yaradıcılıq Mərkəzi qış tətili günlərində Muxtar Respublikanın bir sıra sənaye müəssisəsinə ekskursiyalar təşkil edir. Belə ekskursiya-lardan biri də Naxçıvan Muxtar Respublikası Texniki Yaradıcılıq Mərkəzinin Tədbirlər Planına əsasən Naxçıvan Gəmiqaya Mebel Fabriki MMC-də təşkil olundu. Mərkəzin bir qrup dərnək rəhbəri və dərnək üzvləri əvvəlcə fabrikin kəsim sexində oldular. Burada ayrı- ayrı mebel hissələrinin kəsilməsi prosesi izlənildi. Döşək hazırlanması sexində döşək və yorğanların hazırlanması texnologiyası haqqında ekskursiya iştirakçılarına məlumat verildi.

Döşəmə sexində divan- kreslo və yumşaq stul dəstlərinin hazırlanması prosesini izlədikdən sonda hazır məhsul çıxışı sexində dərnək üzvlərinin sifarişlə hazırlanmış yataq, uşaq otağı, qonaq otağı və mətbəx mebelləri ilə tanışlıq imkanları oldu.

Dərnək üzvləri daxili bazar üçün hazırlanmış mebellərin onlarda xoş təəsurat yaratdığını bildirdilər.