Fevralın 5-də Naxçıvan şəhər 16 nömrəli tam orta məktəbin VII sinif şagirdləri üçün kimya müəllimi Əhmədova Nahidə Yusif qızı laboratoriyada “Kimyəvi reaksiyaların tipləri“ mövzusunda açıq dərs keçmişdir. Dərs zamanı qruplarla və kollektivlə iş təlim formalarından və Venn diaqramı, klaster, əqli hücum iş üsullarından istifadə olunmuşdur. Kimyəvi reaksiyaların mövcud olan 4 tipi də əyani şəkildə təcrübələr vasitəsilə öyrənilmişdir. Parçalanma reaksiyalarına nümunə olaraq, ammonium bixromatın, kalium permanqanatın parçalanması təcrübələri, birləşmə reaksiyalarına uyğun olaraq, alüminiumun yodla reaksiyasından alüminium-yodidin yaranması təcrübəsi yerinə yetirilmişdir.

Laborant və müəllimin iştirakı ilə əvəzetmə reaksiya tipinə uyğun olaraq, alüminiumun xlorid turşusu ilə qarşılıqlı təsirindən alüminium-xloridin və hidrogenin yaranması, dəmirin mis (II) sulfatla reaksiyalarının təcrübələri şagirdlər tərəfindən maraqla izlənilmişdir. Bəsit maddənin mürəkkəb maddə atomlarından birini əvəz etməsi əyani şəkildə göstərilmişdir. Dəyişmə reaksiyalarına misal olaraq, dəmir (III) xloridin kalium tiosianidlə, sulfat turşusu katalizatorunun iştirakı ilə saxarozanın Bertole duzu ilə reaksiyaları aparılmışdır. Mürəkkəb maddə atomlarının yerdəyişməsini göstərən reaksiya tənlikləri şagirdlər tərəfindən tərtib olunmuşdur.

Dərs müddətində fəal təlimin mərhələləri ardıcıl olaraq yerinə yetirilmişdir.