Naxçıvan Qızlar liseyində biologiya , coğrafiya və fizika fənlərinin qarşılıqlı inteqrasiyası əsasında “Dalğalar” mövzusunda innovativ dərs keçirilmişdir. Dərs liseyin əməkdar müəllimi Yeganə Mustafayeva, gənc müəllimlər Nahirə Tağızadə və Zeynəb Mustafazadə tərəfindən keçirilmişdir.

Dərsin biologiya fənninə inteqrasiyasındakı məqsəd səs dalğalarının insan həyatındakı rolunu aydınlaşdırmaqdır. Belə ki, ətraf aləmin dərk edilməsində eşitmə orqanı çox böyük əhəmiyyət daşıyır. Çünki biz eşitmə orqanımız sayəsində baş verən hadisələri dərk edirik, müxtəlif səslərdən zövq alırıq və özümüzü təhlükələrdən qoruyuruq .

Dərsin coğrafiya fənninə inteqrasiyasında şagirdlərə seysmik dalğalar, külək dalğaları və sunami haqqında məlumat verildi. Məqsəd zəlzələ zamanı yaranan seysmik dalğalar, bu dalğanı qeydə alan cihaz - seysmoqraf, ilk seysmoqrafın yaranma tarixi və insanların həyatında yaratdığı fəsadlar haqqında məlumatları şagirdlərə çatdırmaq idi.

Dərsin fizika fənninə inteqrasiyasında isə şagirdlər dalğaların yayılma sürəti, dalğa uzunluğu və növləri haqqında məlumat əldə etdilər. Şagirdlərə səs dalğalarının yayıldığı mühitlər , bir mühitdən digərinə keçdikdə sürətinin necə dəyişməsi izah olundu. Eyni zamanda elektromaqnit dalğaları və onların müasir həyatda - radiorabitə , tibb sahəsi və bir çox başqa istiqamətlərdəki rolu barədə şagirdlərə məlumat verildi.

Dərs şagirdlər tərəfindən maraqla dinlənilmiş və suallar cavablandırılmışdır.