19 fevral 2020-ci il tarixdə Kəngərli Rayon Təhsil Şöbəsinin təşkilatçılığı ilə Şahtaxtı kənd tam orta məktəbində  “Cəlil Məmmədquluzadə və  Azərbaycan dili”  mövzusunda tədbir keçirilib. Tədbiri giriş sözü ilə açan Təhsil Şöbəsinin aparıcı məsləhətçisi Şəfəq Camallı  bildirib ki, Cəlil Məmmədquluzadə yaradıcılığının bütün sahələrində ana      dili məsələsinə xüsusi diqqət ayırmışdır. Nəsr və  dramaturji yaradıcılığında sənətkar ədəbi  dili xalqa yaxınlaşdırmış, ədəbi  dili    xalq   dili    əsasında inkişaf etdir-mişdir.

XXI əsrin ikinci yarısında ana dilimizin saflığı uğrunda M.F.Axundzadə və H.B.Zərdabi tərəfindən aparılan mübarizəni XX əsrin əvvəllərində Cəlil Məmmədquluzadə və naşiri olduğu "Molla Nəsrəddin" jurnalı davam etdirib. Və sənətkarın ömrünün sonunadək davam etdirdiyi xalqın səadəti, azadlığı və tərəqqisi  naminə apardığı  mücadilənin əsasını ana  dilinin  saflığı, təmizliyi uğrunda mübarizə təşkil edib.

Sonra çıxış edən Şahtaxtı kənd tam orta məktəbin Azərbaycan dili və ədəbiyyat müəllimi  Solmaz Qurbanova öz çıxışında qeyd edib ki, dil hər bir millətin maddi və mənəvi irsini qoruyan və inkişaf etdirən ən mühüm  və ən gülcü vasitədir. Hər bir insan öz ana dilini yaxşı bilməli və onu qorumalıdır. Ana dili insanın mənəvi aləminin zənginləşməsində, dünyagörüşünün  genişlənməsində , mükəmməl təhsil almasında, öz soydaşları ilə ünsiyyət qurmasında mühüm rol oynayır. Ana dili millətin özünəməxsusluğunu  qorumaqla yanaşı, tərcümə vasitəsilə  başqa xalqların irsi ilə tanış olmağa, onlarla ünsiyyət  qurmağa imkan yaradır.

Tədbirdə şagirdlər tərəfindən vətənə, ana dilinə həsr olunmuş şeirlər səsləndirilib və ədəbi-bədii kompozisiya təqdim olunub.