Fevralın 27-də Heydər Əliyev Uşaq-Gənclər Yaradıcılıq Mərkəzində “Zərərli vərdişlərə yox deyək, həmişə sağlam olaq” devizi altında Naxçıvan şəhər tam orta məktəblərinin oğlan komandaları arasında dama birinciliyi keçirilmişdir. Yarışın açılış mərasimində çıxış edən Naxçıvan Şəhər Gənclər və İdman İdarəsinin rəisi Xəyal Qurbanov bildirmişdir ki, birinciliyin keçirilməsində məqsəd məktəbliləri zərərli vərdişlərdən kənarlaşdırmaq və onları sağlam həyat tərzinə uyğunlaşdırmaqdan ibarət olmuşdur.

Daha sonra Heydər Əliyev Uşaq-Gənclər Yaradıcılıq Mərkəzinin direktoru Murad Babayev və Naxçıvan Şəhər Təhsil Şöbəsinin əməkdaşı Şahmar Hüseynov çıxış edərək tədbirin keçirilmə məqsədi haqqında danışmış və komandalara uğurlar arzulamışlar. Naxçıvan Şəhər Gənclər və İdman İdarəsi, Naxçıvan Şəhər Təhsil Şöbəsi və Heydər Əliyev Uşaq-Gənclər Yaradıcılıq Mərkəzinin birgə təşkilatçılığı ilə keçirilən yarışda 17 tam orta məktəbdən 51 şagird iştirak etmişdir. Olimpiya sistemi üzrə (uduzan çıxır) damanın mövcud qaydalarına əsasən keçirilən yarışın yekun nəticəsinə əsasən, 1 nömrəli tam orta məktəbin komandası I yerə, 13 nömrəlitam orta məktəbin komandası II yerə, 3 nömrəli və 6 nömrəli tam orta məktəblərin komandaları isə III yerlərə layiq görülmüşlər.

Sonda qalib komandalar təşkilatçıların diplomları ilə mükafatlandırılmışlar.