Naxçıvan  şəhər   8 nömrəli  tam orta  məktəbdə 28  fevral  2020-ci  il  tarixdə  həmin  məktəbin  ingilis  dili  müəllimi  Turac  Hacıyevanın     X  sinfində  “Natural  Disasters”   mövzusunda  açıq  dərsi  keçirilmişdir. Dərsdə  Naxçıvan  Şəhər  Təhsil  Şöbəsinin   əməkdaşları,  məktəb  rəhbərliyi, müəllimlər və Naxçıvan Şəhər  1, 7, 11 və 17 nömrəli məktəblərin ingilis dili müəllimləri iştirak  etmişdir.  Əvvəlcə dərsdə tarix fənni ilə inteqrasiya yaradılaraq  şagirdlər   tərəfindən  fevral  ayında  baş  verən  hadisələr  haqqında  qısa  məlumat  verildi. Şagirdlərdə  vətənpərvərlik  hislərinin təbliği məqsədilə “Xocalı  faciəsi”  və  Milli  qəhrəman Mübariz  İbrahimov  haqqında  danışıldı.

Dərsin məqsədi təbii fəlakətlərin yaranma səbəbləri və təbii fəlakət baş verən zaman özünü qoruma yollarının şagirdlərə öyrədilməsidir. Motivasiya bölməsində şagirdlərə təqdim olunan krossvordu həll edərək cavablardan mövzunun adını müəyyənləşdirildi. “Təbii fəlakətlər nə üçün baş verir və nələrə səbəb olur?” tədqiqat sualı ətrafinda fikir mübadiləsi apararaq tornado, daşqınlar sunami, meşə yanğınları, zəlzələ kimi təbii fəlakətlər haqqında məlumat mübadiləsi aparıldı. Şagirdlər qruplarda işlədilər. İngilis  dili  fənni  coğrafiya,   tarix və kimya fənləri  ilə  inteqrasiya  olundu.  Sonra  vulkan  püskürməsi hadisəsi əyani şəkildə şagirdlər tərəfindən göstərildi.  Təbii  fəlakətlər  haqqında  hazırlanmış  videolar  şagirdlər tərəfindən izlənildi.  Dərs bütövlükdə ingilis dilində aparıldı. Sonda Təhsil Şöbəsinin əməkdaşları və fənn müəllimləri tərəfindən dərs müzakirə olundu.