Bu gün Naxçıvan Muxtar Respublikası Təhsil Nazirliyinin təşkilatçılığı ilə Turist Diyarşünaslıq Mərkəzində dərnək üzvlərinə “Sağlamlığımızı qoruyaq” mövzusunda onlayn dərs keçirilib. Şagirdlərin biliklərinin möhkəmləndirilməsi və asudə vaxtlarının səmərəli təşkili məqsədilə keçirilən dərsdə dərnək rəhhəri Urfanə Qasımova dərnək üzvlərinə sağlamlığımıza zərər verən amillər və onlardan qorunmaq üsulları haqqında məlumat verib və bildirib ki, sağlamlığımızı möhkəmləndirmək və qorumaq üçün şəxsi gigiyena və təmizliyə riayət etməli, ətraf mühiti təmiz saxlamalı, düzgün istirahət etməli, idmanla məşğul olmalı və ən əsası yoluxucu xəstəliklərdən qorunmaq üçün qaydalara düzgün əməl etməliyik.
Məktəblilərin yay tətilinin səmərəli təşkili məqsədilə Naxçıvan şəhər 9 nömrəli tam orta məktəbin süni örtüklü maydançasında voleybol üzrə yoldaşlıq görüşü keçirilib. Görüşdə Naxçıvan Qarnizonu tam orta məktəbinin “Qartal” komandası və Naxçıvan Şəhər Uşaq Gənclər İdman Məktəbinin komandası qarşılaşıb.
Xüsusi qabiliyyət tələb edən ixtisaslara qəbul olmaq istəyən abituriyentlərin qabiliyyət imtahanlarında iştirak etmək üçün qeydiyyat müddəti avqustun 18-dək uzadılıb.
Bu gün Qıvraq qəsəbə tam orta məktəbində Kəngərli Rayon Uşaq-Gənclər İdman Məktəbinin dərnək üzvləri ilə “Boksda fiziki və texniki hazırlıq” mövzusunda məşğələ keçirilib. Məşğələnin keçirilməsində məqsəd məktəblilər arasında boks idman növünün kütləviliyinə nail olunması, gənc nəslin idmana olan marağının artırılması, şagirdlərin asudə vaxtlarının səmərəli keçirilməsindən ibarət idi. Məşğələ zamanı boks idman qrupunun rəhbəri Aftandil Musayev mövzu ilə bağlı şagirdlərə ətraflı məlumat verib, gücün inkişaf etdirilməsinin müxtəlif üsul və vasitələrindən danışıb. Qrup rəhbəri idmançının işinin təkcə məşqlərə deyil, həm də onun iradə qüvvəsi, məqsədyönlülük, səbirlilik kimi daxili keyfiyyətlərinin inkişaf etdirilməsinə yönəlməli olduğunu qeyd edib və şagirdləri maraqlandıran sualları cavablandırıb.
