Muxtar diyarımızda dövlət atributlarına hörmət və ehtiram hər zaman olduğu kimi bu gün də yüksək səviyyədədir. Bu, Naxçıvanın qədim dövlətçilik tarixinə malik olması və Azərbaycanın dövlətçilik ənənəsinin qorunub saxlanılmasındakı xüsusi rolu ilə birbaşa bağlıdır. Beşminillik şəhər mədəniyyəti tarixini özündə yaşadan Naxçıvan dünya sivilizasiyasında möhtəşəm mədəniyyət nümunələri ilə yanaşı, yüz illər boyu formalaşmış böyük dövlətçilik ənənələrinin də saxlanc yeri olmuşdur. Bununla əlaqədar olaraq “17 Noyabr-Naxçıvan Muxtar Respublikasının Dövlət Bayrağı Günü” münasibətilə 12 noyabr 2020-ci il tarixdə Naxçıvan şəhər 1 nömrəli tam orta məktəbdə şəhər ümumtəhsil məktəb şagirdləri arasında “Bayraq kimliyimdir” mövzusunda şeir müsabiqəsi keçirilmişdir.
Muxtar respublikamızda gələcəyimiz olan uşaqlar, o cümlədən xüsusi qayğıya ehtiyacı olan uşaqlar daim dövlətimizin diqqət və qayğısı əhatəsindədirlər. Onların sağlam böyümələri, biliklərə yiyələnmələri, dünyagörüşlərinin, intellektual səviyyələrinin inkişafı, xüsusi istedada malik olanların aşkara çıxarılması, milli-mənəvi dəyərlərə sadiq vətənpərvər gənc kimi formalaşması hər zaman diqqətdə saxlanılır və bu istiqamətdə ardıcıl tədbirlər həyata keçirilir. Bu tədbirlərin davamı olaraq 12 noyabr 2020-ci il tarixdə Naxçıvan Muxtar Respublikasının Təhsil, Əmək və Əhalinin Sosial Müdafiəsi nazirliklərinin və Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə valideynlərini itirmiş, aztəminatlı və sağlamlıq imkanları məhdud uşaqlara qış geyimləri verilib.
“12 noyabr - Azərbaycan Respublikasının Konstitusiya Günü” münasibətilə Naxçıvan Muxtar Respublikası Təhsil Nazirliyinin təşkilatçılığı ilə noyabrın 11-də muxtar respublika ümumtəhsil məktəblərinin IX-XI sinif şagirdləri arasında “Mənim hüquqlarım” mövzusunda inşa yazı müsabiqəsi keçirilib. Müsabiqənin keçirilməsində əsas məqsəd məktəbliləri vətənə məhəbbət ruhunda tərbiyə etmək, onlarda vətənpərvərlik tərbiyəsini formalaşdırmaq, dövlətçilik tarixində, cəmiyyətin qorunması və rifahı rolunda Konstitusiyanın rolu ilə bağlı fikirləri təbliğ etməkdən ibarətdir.
Naxçıvan Muxtar Respublikası Təhsil Nazirliyinin təşkilatçılığı ilə Naxçıvan Döyüş Şöhrəti Muzeyində məktəblilərin vətənpərvərlik ruhunda yetişdirilməsi, milli-mənəvi dəyərlərin qorunub saxlanılması, vətəndaşlıq hisslərinin aşılanması məqsədilə Naxçıvan şəhər ümumtəhsil məktəblərinin şagirdlərinə 11 noyabr 2020-ci il tarixdə növbəti açıq dərs keçirilmişdir.
