Fevralın 6-da Culfa şəhər 3 nömrəli tam orta məktəbdə Culfa Rayon Polis Şöbəsi, Təhsil Şöbəsi və Gənclər və İdman İdarəsinin birgə təşkilatçılığı ilə yetkinlik yaşına çatmayanların marifləndirilməsi məqsədi ilə tədbir keçirilib. Tədbirdə Culfa Rayon Təhsil Şöbəsinin aparıcı məsləhətçisi Sadiq Əliyev, Culfa Rayon Polis Şöbəsinin yetkinlik yaşına çatmayanlarla profilaktiki işin təşkili üzrə inspektoru, polis baş leytenantı Səyyad Əliyev çıxış edərək diqqətə çatdırıblar ki, bu gün muxtar respublikada yeniyetmə və gənclərin milli ruhda tərbiyəsi, onların hərbi-vətənpərvərlik tərbiyəsinin gücləndirilməsi, sosial şəbəkələrdən təhlükəsiz istifadəsinə, Naxçıvan turizm potensialı məqsədilə təbliğ olunması, tütün məhsullarının istifadəsinin zərərli təsirləri eləcə də sağlam həyat tərzinin təbliği diqqət mərkəzindədir.
Heydərabad qəsəbə tam orta məktəbində Naxçıvan Muxtar Respublikasının yaradılmasının 96-cı ildönümü ilə bağlı şeir müsabiqəsi keçirilmişdir. Müsabiqədə Sədərək rayon Təhsil şöbəsinin əməkdaşları, məktəbin müəllim kollektivi və VII-X sinif şagirdləri iştirak etmişdir. Şagirdlərin şeirləri Naxçıvan Muxtar Respublikasının milli mədəniyyət, tarixinə həsr olunmuşdur. 
Naxçıvan Muxtar Respublikasının 96-cı il dönümü ilə əlaqədar tərtib olunmuş tədbirlər planına uyğun olaraq, Şərur şəhər 2 nömrəli tam orta məktəbdə 9, 10 və 11-ci sinif şagirdləri arasında “Ulu yurdum-Naxçıvanımˮ mözusunda inşa yazı müsabiqəsi keçirilmişdir. İnşa yazı müsabiqəsində məktəbdaxili mərhələnin qalibi olan 32 şagird iştirak etmişdir. Müsabiqənin sonunda Kərimbəyli kənd tam orta məktəbinin şagirdi Nadirova Fəridə Mais qızı – I yerə, Şəhər 2 nömrəli tam orta məktəbinin şagirdi Hüseynova Arzu Əli qızı - II yerə və Aralıq kənd tam orta məktəbinin şagirdi Məmmədova Nuray İntiqam qızı – III yerə layiq görülmüşdür. 
