10 dekabr 2019-cu il tarixdə Naxçıvan Muxtar Respublikası Gənclər Fondunun təşkilatçılığı ilə Naxçıvan şəhər ümumtəhsil məktəblərinin şagirdləri arasında “İnteqrasiya” inteqrativ-intellektual oyunu üzrə “Muxtariyyət Kuboku” yarışı keçirilmişdir. Yarışın keçirilməsində əsas məqsəd iştirakçıların intellektual düşünmə qabiliyyətlərini stimullaşdırmaq, onlara analitik düşüncə tərzini aşılamaq, fənlərin bir-birilə bağlılığını şagirdlərə göstərmək və bu inteqrasiyanın köməyindən istifadə edərək xüsusi istedada malik olan şagirdləri müəyyənləşdirib gələcək fəaliyyətlərində stimul yaratmaqdır.

Cari ilin oktyabrın 26-da Heydər Əliyev Uşaq-Gənclər Yaradıcılıq Mərkəzində innovativ dərnəklər fəaliyyətə başlamışdır. Bu məqsədlə muxtar respublikanın ümumtəhsil məktəblərində, eləcə də Naxçıvan Qarnizonu tam orta məktəbində Heydər Əliyev Uşaq-Gənclər Yaradıcılıq Mərkəzinin əməkdaşlarının iştirakı ilə yeni yaradılan dərnəklərlə bağlı təqdimat keçirilmişdir. Tədbirdə məktəbin direktoru Natiq Əhmədov çıxış edərək qeyd etdi ki, məktəbdənkənar təhsil müəssisələri uşaq və gənclərin maraq və bacarıqlarının, intellektual səviyyələrinin və yaradıcılıq qabiliyyətlərinin inkişafında, asudə vaxtlarının səmərəli təşkilində mühüm əhəmiyyət daşıyır.

Naxçıvan Muxtar Respublikası Təhsil Nazirliyinin və Maliyyə Nazirliyi yanında Maliyyə Tədris Mərkəzinin təşkilatçılığı ilə Naxçıvan şəhərindəki 14 nömrəli tam orta məktəbdə “Büdcəmizi anlayaq” layihəsi çərçivəsində növbəti təlim təşkil edilib. 50-dən çox məktəblinin iştirak etdiyi təlimdə Maliyyə Tədris Mərkəzi tərəfindən təlimin mahiyyəti, məktəbli büdcəsinin səmərəli istifadəsi, qənaət, maliyyə məqsədlərinin düzgün qoyulması barədə məlumat verilib. Təlimin interaktiv hissəsində xüsusi oyun vasitəsi ilə şərti ailənin gəlir və xərclərinin müqayisəli təhlili aparılıb.

Sonra məktəblilərin təqdimatı dinlənilib. Bu mərhələdə 3 komanda iştirak edib. İnteraktiv mərhələdən sonra fəal iştirak edən komandalara Maliyyə Tədris Mərkəzinin sertifikatları təqdim olunub.