Martın 11-də Naxçıvan Muxtar Respublikası Təhsil Nazirliyinin təşkilatçılığı ilə Heydər Əliyev Uşaq Gənclər Yaradıcılıq Mərkəzində nazirliyin birbaşa tabeliyində olan məktəbdənkənar təhsil müəssisələrinin dərnək üzvləri arasında “Elimizə bahar gəlir” mövzusunda rəsm müsabiqəsi keçirilib.

Müsabiqə başlamamışdan əvvəl Naxçıvan Muxtar Respublikası Təhsil Nazirliyi Aparatının sektor müdiri Rasim Rüstəmov çıxış edərək bildirib ki, muxtar respublikamızda mədəniyyətin, o cümlədən təsviri sənətin, xüsusən də rəssamlığın inkişafına böyük diqqət və qayğı göstərilir. Qeyd olunub ki, Novruz bayramına həsr olunmuş rəsm müsabiqəsi muxtar respublika məktəblilərinin yaradıcılıq qabiliyyətlərinin daha da inkişaf etdirilməsi, gənc nəslin mənəvi, bədii və estetik dünyagörüşünün formalaşmasına xidmət edir.

Qeyd edək ki, martın 12-də cari ildə muxtar respublikanın bütün ümumtəhsil müəsisələrinin 11-ci sinfini bitirən şagirdlər üçün buraxılış imtahanı keçiriləcək. Naxçıvan Muxtar Respublika Təhsil Nazirliyi tərəfindən imtahanın keçirilməsi üçün bütün təşkilati işlər artıq yekunlaşdırılıb. Buraxılış imtahanları Naxçıvan şəhəri üzrə Heydər Əliyev adına Hərbi Liseydə, Heydər Əliyev adına tam orta məktəbdə, Naxçıvan şəhər 5 və 14 nömrəli tam orta məktəblərdə keçiriləcək.

Rayonlar üzrə isə Şərur rayonunda 1, 2 nömrəli, Babək rayonunda 1 nömrəli  və  Şıxmahmud kənd tam orta məktəblərində, Ordubad rayonunda 3 nömrəli, Culfa rayonunda 2, 3 nömrəli, Şahbuz rayonunda 1 nömrəli, Kəngərli rayonunda Qıvraq qəsəbə, Sədərək rayonunda  1 nömrəli tam orta məktəblərdə  keçiriləcək.

Naxçıvan Muxtar Respublikası Təhsil Nazirliyi və AMEA Naxçıvan Bölməsi tərəfindən 2019-cu ildən başlayaraq reallaşdırılan “Sabahın tədqiqatçıları” layihəsi 2021-2022-ci tədris ilində də bir sıra uğurlar qazanıb. “Sabahın tədqiqatçıları 2022” layihəsi çərçivəsində 2 məktəblinin elmi rəhbərləri ilə birlikdə hazırladıqları “Naxçıvan MR “Qırmızı Kitabı”na daxil olan su-bataqlıq quşları” adlı məqalə Rusiyanın Beynəlxalq Elmi Əməkdaşlıq Mərkəzi, "Elm və təhsil" nəşri olan “Tələbə Elmi Formu 2022” III Beynəlxalq elmi-praktik konfransında (Студенческий Научный Форум 2022, III Международная научно-практическая конференция) dərc olunub, jurnalın rəsmi internet səhifəsində yerləşdirilib.