Naxçıvan Müəllimlər İnstitutu muxtar respublikanın Təhsil Nazirliyi ilə birlikdə “Ümumtəhsil məktəblərində psixoloji xidmətin təşkili və səmərəliliyinin artırılması” mövzusunda elmi-praktik konfrans keçirib.

Konfranda Naxçıvan Müəllimlər İnstitutunun rektoru Elbrus İsayev bildirib ki, müasir təhsilin qarşısında duran əsas vəzifələrdən biri psixoloji sağlam, sabahkı inkişafa hazır, təbiətdə və cəmiyyətdə gedən proseslərin dərketmə qabiliyyətinə malik sağlam nəsil yetişdirməkdir. Buna görə də ümumtəhsil məktəblərində psixoloqların işinin  keyfiyyətinin yüksəldilməsi mühüm məsələlərdən biridir. Məktəblərdə psixoloji xidmət işinin tətbiqinin məqsədi tədris və tərbiyənin keyfiyyətini artırmaq, şagirdin fiziki və psixoloji sağlamlığının qorunması işini təmin etməkdən ibarətdir.

Elbrus İsayev Müəllimlər İnstitutunda sosiloji-psixoloji sahədə kadr hazırlığı məsələsindən ətraflı bəhs edib, gələcəkdə bu sahədə peşəkar mütəxəssislərin hazırlanması üçün mühüm tədbirlərin həyata keçiriləcəyini bildirib.

Naxçıvan Muxtar Respublikasının Təhsil naziri Rəhman Məmmədov qeyd edib ki, ümumtəhsil məktəblərinin psixoloq kadrları ilə təmin olunması diqqətdə saxlanılıb, 2018-ci ildən etibarən isə psixoloqların ümumtəhsil müəssisələrinə işə qəbulu müsabiqə yolu ilə aparılır. Hazırda ümumtəhsil müəssisələrində 177 psixoloq fəaliyyət göstərir. Onun da 13-ü müsabiqə yolu ilə işə qəbul olunub.

Təhsil naziri onu da bildirib ki, məktəb psixoloqları içərisində öz işinə daha ciddi yanaşan, yaradıcı, yenilikçi psixoloqlarla yanaşı, öz işinin öhdəsindən gələ bilməyən və vəzifə funksiyalarını düzgün icra etməyən psixoloqlar da var. Nəzərə alınmalıdır ki, gənc və yeniyetmələrin inkişaf dövrünün əsas mərhələsi məhz məktəb dövrünə təsadüf edir. Bu mərhələdə şagirdlərin qarşısına çıxan problemlərin məktəb psixoloqlarının köməyi ilə düzgün diaqnostika və korreksiya edilməsinə böyük ehtiyac var. Buna görə də məktəb psixoloqlarının yerinə yetirməli olduğu vəzifə hər bir məktəbdə xüsusi rol oynayır və bu vəzifənin nə qədər vacib olduğunu aktuallaşdırır.

Konfransın keçirilməsində məqsəd məktəb psixoloqlarının peşəkarlıq səviyyəsinin yüksəldilməsidir.

Müxtəlif mövzularda edilən məruzələrdən sonra konfrans iştirakçıları İnstitutun psixologiya laboratoriyası ilə tanış olublar.

Qeyd edək ki, müəllimlər institutunda ümumtəhsil məktəblərinin 25 psixoloqunun iştirakı ilə 1 həftəlik təlim kurslarına başlanılıb.

Ali Məclisinin Sədri                                  Vasif TalıbovNaxçıvan şəhəri, 07 dekabr 2018-ci il.

Naxçıvan Muxtar Respublikasının təhsil naziri Rəhman Məmmədov çıxış edərək muxtar respublikada təhsilə göstərilən qayğıdan danışıb. Bildirilib ki, Naxçıvan Muxtar Respublikasında təhsilin inkişafı sahəsində ardıcıl tədbirlər görülür, təhsil müəssisələrinin maddi-tədris bazası möhkəmləndirilir. Ötən dövrdə muxtar respublikanın şəhər, rayon və kəndlərində 200-dən çox təhsil müəssisəsi, o cümlədən məktəbəqədər və məktəbdənkənar təhsil, musiqi məktəbləri, Heydər Əliyev adına Hərbi Lisey, ali və orta ixtisas təhsili müəssisələri üçün yeni tədris korpusları tikilib istifadəyə verilib. Bu işlər 2018-ci ildə də davam etdirilib, 2096 şagird yerlik 8 ümumtəhsil məktəbi, Naxçıvan Müəllimlər İnstitutu, Naxçıvan Tibb Kolleci və Ordubad Rayon Təhsil Şöbəsi üçün binalar tikilərək və ya əsaslı şəkildə yenidən qurularaq istifadəyə verilib. Hazırda 3 ümumtəhsil müəssisəsi və Naxçıvan Dövlət Universitetinin tibb fakültəsi üçün binaların tikintisi davam etdirilir.

Muxtar respublikanın ümumtəhsil məktəblərində 5500-dən artıq kompüter və 600-dən çox elektron lövhə quraşdırılıb, laboratoriyalar və fənn kabinələri şagirdlərin istifadəsinə verilib, kitabxanalar 3 milyona yaxın dərslik, 600 mindən çox latın qrafikası ilə nəşr olunmuş bədii ədəbiyyatla təmin olunub. Təhsil müəssisələrinin pedaqoji kadrlara olan tələbatını ödəmək məqsədilə muxtar respublikanın ali təhsil müəssisələrində pedaqoji yönümlü ixtisaslar açılıb, yüksək səviyyəli müəllim kadrların hazırlanması diqqətdə saxlanılıb.

Qeyd olunub ki, sağlamlıq imkanları məhdud uşaqların cəmiyyətə və təhsilə inteqrasiyası da diqqətdə saxlanılıb, məhdud fiziki imkanlı uşaqlar üçün Naxçıvan Regional İnformasiya Mərkəzində Distant Tədris Mərkəzi, görmə və eşitmə qabiliyyəti məhdud uşaqlar üçün isə audio və elektron kitabxana yaradılıb.

Təhsil naziri qeyd edib ki, muxtar respublikanın təhsil müəssisələrində şagird, tələbə və müəllimlərin vahid geyim formasından istifadə etməsi tədrisin və təlim-tərbiyənin yüksəldilməsinə öz müsbət təsirini göstərib. 2018-ci ildən pedaqoji kadrların müsabiqə ilə işə qəbulu isə gənc kadrların işlə təmin olunmasına, eləcə də ümumtəhsil müəssisələrinin bilikli müəllimlərlə təminatına geniş imkanlar açıb. Hazırda muxtar respublikanın ümumtəhsil məktəblərində 49 min 224 şagirdin təhsili ilə 6642 müəllim məşğul olur. Onlardan 44-ü yeni tədris ili ərzində Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən keçirilən müsabiqədə yüksək nəticə göstərərək işlə təmin olunub. Hazırda rayon mərkəzindən uzaq məsafədə yerləşən kənd məktəblərində fəaliyyət göstərən 80 müəllimə həvəsləndirmə tədbirləri tətbiq edilib. Müəllimlərin ictimai fəallığı da artıb. Belə ki, muxtar respublika müəllimlərindən 13-ü Naxçıvan Muxtar Respublikası Ali Məclisinin deputatıdır. Müəllimlərin maddi rifah halının yaxşılaşdırılması da diqqətdə saxlanılıb, Naxçıvan Muxtar Respublikası Ali Məclisi Sədrinin Sərəncamları ilə bilik və bacarıqları qiymətləndirilmiş müəllimlərin əməkhaqları və dərs saatları artırılıb.

Müəllim əməyinə verilən yüksək qiymət, təhsil müəssisələrində yaradılanlar tədrisin səviyyəsini artırıb, ali və orta ixtisas təhsili müəssisələrinə tələbə qəbulu ilbəil artıb. Əvvəlki illərdə olduğu kimi, 2017-2018-ci tədris ilinin də nəticələri uğurlu olub, məzunlardan 1781-i ali məktəblərə, 615-i isə orta ixtisas təhsili müəssisələrinə qəbul olub. Onlardan 331-i 500-700 arası bal toplayıb, 6 məzun isə Prezident təqaüdünə layiq görülüb. Muxtar respublikada təhsil sahəsində görülən işlər müəllim nüfuzunu yüksəldib, müəllimlik peşəsinə marağı əhəmiyyətli dərəcədə artırıb. Bunun nəticəsidir ki, 2017-2018-ci tədris ili üzrə məzunların 658-i, yaxud 37 faizi ali təhsil müəssisələrinin pedaqoji ixtisaslarına qəbul olub.

Təhsil naziri Rəhman Məmmədov bildirib ki, müəllimlərin əməyi dövlətimiz tərəfindən yüksək qiymətləndirilib. Muxtar respublikanın 24 ümumtəhsil məktəbi “ən yaxşı məktəb”, 40 müəllim isə “Azərbaycan Respublikasının ən yaxşı müəllimi” adına layiq görülüb. Müəllimlərdən 112-si “Azərbaycan Respublikasının Əməkdar Müəllimi”, 181-i isə “Naxçıvan Muxtar Respublikasının Əməkdar Müəllimi” fəxri adlarına layiq görülüb, 104 müəllim “Tərəqqi” medalı ilə təltif olunub.

Təhsil naziri təhsilə və müəllimlərə göstərdiyi diqqət və qayğıya və Naxçıvan Muxtar Respublikası müəllimlərinin konfransına ünvanladığı məktuba görə muxtar respublikanın bütün təhsil işçiləri adından Naxçıvan Muxtar Respublikası Ali Məclisinin Sədrinə dərin minnətdarlığını bildirib.

Konfransda Naxçıvan Müəllimlər İnstitutunun rektoru Elbrus İsayev, Naxçıvan Tibb Kollecinin direktoru Sona Məmmədova, Naxçıvan Qızlar Liseyinin direktoru Aidə Allahverdiyeva və Naxçıvan şəhər 2 nömrəli tam orta məktəbin müəllimi Ülvanə Məmmədli çıxış ediblər. Çıxışlarda bildirilib ki, Azərbaycan xalqının milli təfəkküründə müəllim adı hər zaman ucalıq, ziyalılıq və mənəvi saflıq rəmzi kimi təcəssüm olunub, böyük hörmət və yüksək ehtiramla çəkilib. Sosial statusundan, tutduğu vəzifədən asılı olmayaraq, hər bir şəxs cəmiyyətdəki mövqeyinə, formalaşmasına və qazandığı biliklərə görə ilk növbədə müəllimlərinə borcludur. Çünki müəllimlər əsas vəzifəni gənclərin təhsili, təlim-tərbiyəsi məsələsini yerinə yetirirlər. Müəllim əməyinin nəticəsində cəmiyyət formalaşır, savadlı, bilikli, geniş dünyagörüşlü, nümunəvi əxlaqa malik insanlar yetişir. Muxtar respublikanın təhsil müəssisələrində yaradılmış şərait müəllimləri daha yaxşı işləməyə sövq edir.

Çıxış edənlər təhsilin inkişafı üçün yaradılan şəraitə görə muxtar respublikanın müəllimləri adından Naxçıvan Muxtar Respublikası Ali Məclisinin Sədrinə minnətdarlıqlarını bildiriblər.

Tədbirin aparıcıları görkəmli pedaqoqların əsərlərindən parçalar oxuyub, təhsillə bağlı müdrik fikirləri konfrans iştirakçılarının diqqətinə çatdırıblar.

Sonra görkəmli pedaqoq, Naxçıvanda ilk dünyəvi məktəbin əsasını qoymuş maarifçi Məhəmməd Tağı Sidqiyə həsr olunmuş “Xalqın müəllimi” sənədli filminə baxış olub.