Naxçıvan Muxtar Respublikası Təhsil Nazirliyi və Azərbaycan Respublikası Dövlət İmtahan Mərkəzi Publik Hüquqi Şəxsin Naxçıvan Muxtar Respublikası Regional Bölməsinin təşkilatçılığı ilə noyabrın 1-də şəhər və rayon Təhsil şöbələrinin və təhsil müəssisələrinin “Şagird-məzun” informasiya sisteminin əlaqələndiriciləri üçün seminar  keçirilib. Seminarda regional Bölmənin rəhbəri Sabir Məmmədov 2019-cu ildə tətbiqi nəzərdə tutulan ümumi təhsil pilləsində təhsilalanların yekun qiymətləndirilməsi (buraxılış) imtahanlarının və ali təhsil müəssisələrinə qəbul  imtahanlarının modeli və “Nəzarətçilərin elektron qeydiyyatı”  sistemindən istifadə qaydaları haqqında  məlumat verdi. Bildirildi ki, I-IV ixtisas qrupları üzrə ali təhsil müəssisələrinə qəbul olmaq üçün müsabiqə zamanı abituriyentlərin buraxılış imtahanından əldə etdikləri nəticələri də nəzərə alınacaq və qəbul imtahanından toplanılan balın üzərinə əlavə olunacaq. Yəni abituriyentlər buraxılış və qəbul imtahanlarında topladıqları balların cəminə  əsasən ali təhsil müəssisələrinin müsabiqəsində iştirak edəcəklər.Qeyd edildi ki, test imtahanlarına muxtar respublikanın ümumtəhsil müəssisələrindən cəlb olunan müəllimlərdən ibarət zal nəzarətçiləri bazası formalaşdırılır.

Bu gün Naxçıvan Muxtar Respublikasında gənclərin yüksək səviyyədə təhsil alması, intellektual səviyyəsinin yüksəldilməsi məqsədilə tədbirlər görülür. Bu tədbirlərdən biri də Naxçıvan Muxtar Respublikası Ali Məclisi Sədrinin 27 iyul 2015-ci il tarixli Sərəncamı ilə ali və orta ixtisas təhsili müəssisələrində ixtisasların müvafiq təşkilatlara hamiliyə verilməsidir.

Mövcud Sərəncam bilikli və təcrübəli gənc kadrların hazırlanması, muxtar respublikada kadr potensialının formalaşması, yüksək intellektli mütəxəssislərin hazırlanması və gələcəkdə onların iş yerləri ilə təmin olunması baxımından böyük imkanlar yaradır. Bundan əlavə muxtar respublikada fəaliyyət göstərən təşkilatlarla ali təhsil müəssisələri arasında əməkdaşlığın inkişafı, tələbələrə təcrübi biliklərin öyrədilməsi və yüksəkixtisaslı kadrların hazırlanmasına da böyük töhfə verir.

Naxçıvan şəhərindəki İlham Əliyev adına Olimpiya-İdman Kompleksində Naxçıvan Muxtar Respublikası Təhsil, Gənclər və İdman nazirlikləri, Səfərbərlik və Hərbi Xidmətə Çağırış üzrə Dövlət Xidməti, Şahmat, Basketbol, Yüngül Atletika və Atıcılıq federasiyalarının təşkilatçılığı ilə muxtar respublikada fəaliyyət göstərən ümumtəhsil məktəblərinin şagirdləri arasında spartakiadanın açılış və bağlanış mərasimi keçirilib.

Azərbaycan Respublikasının Dövlət Himni səsləndirildikdən sonra aparıcı spartakiada haqqında iştirakçılara məlumat verib. Qeyd edilib ki, muxtar respublikada gənc­lərin idmana cəlbi, onlara sağlam həyat tərzinin aşılanması daim diqqət mərkəzində saxlanılır, yaradılan müasir idman mühiti gənclərin bədən tərbiyəsi və idmana olan marağını artırır. Bu sahənin inkişafı üçün mütəmadi olaraq idman yarışları təşkil edilir ki, bu spartakiada da məhz həmin yarışlardan biridir.

Tədbir Naxçıvan Dövlət Filarmoniyasının mahnı və rəqs ansamblı və Naxçıvan Şəhər Mədəniyyət Şöbəsinin “Şəlalə” instrumental rəqs ansamblının ifasında konsert pro­qramı ilə davam edib.

Mükafatlandırma mərasimində ilk olaraq şahmat üzrə keçirilən yarışların qalibləri kürsüyə dəvət olunub. Belə ki, qızlar arasında Nəsrin Babayeva (Naxçıvan), Nazlı Hümbətova (Naxçıvan) və Zərrin Məmmədli (Ordubad), oğlanlar arasında isə Seyid Hüseyn (Ordubad), Ayxan Zeynalov (Şərur) və Ərturan İsmayılov (Naxçıvan) ilk üç pillədə ­qərarlaşıblar.  Yüngül atletika yarışlarında 100 metr məsafədə qızların mübarizəsində Nərmin Mehdiyeva (Culfa), Tamella Qurbanova (Naxçıvan) və Aytən Rəhimova (Naxçıvan) finiş xəttinə ilk üç pillədə çatıblar. Bu məsafədə oğlanlar arasında eyni nəticəni Fərid Əsgərli (Naxçıvan), İlkin Rəsulov və Nurxan Əliyev (hər ikisi Heydər Əliyev adına Hərbi Lisey) də təkrarlayıblar. 400 metr məsafədə qızlar arasında Xatun Oruclu (Ordubad), Nərminə Əliyeva (Sədərək) və Zeynəb Bağırova (Şərur), oğlanlar arasında isə Vüsal Fərəcov, Hidayət İsmayılov (hər ikisi Heydər Əliyev adına Hərbi Lisey) və Səfər Tağıyev (Naxçıvan) qalib adını qazanıblar.
Basketbol yarışlarında bütün rəqibləri üzərində qələbə qazanan Culfa komandası spartakiadanın qalibi olub. Digər iki pillədə Naxçıvan şəhər və Babək rayon komandaları qərarlaşıb.
Qızlar arasında stolüstü tennis yarışlarının qalibi Naxçıvan idmançısı Nurtac Hüseynova olub. Gültəkin Süleymanova (Şərur) və Selcan Hüseynova (Sədərək) isə yarışları ikinci və üçüncü pillədə başa vurublar. Oğlanlar arasında isə Sənan Məmmədov (Şərur) qalib adını qazanıb. İsgəndər Quliyev (Naxçıvan) ikinci, Yusif Yusifli (Culfa) üçüncü olub.
Spartakiadada qızlar arasında keçirilən həndbol üzrə yarışlarda Şərur rayon komandası qalib gəlib. Naxçıvan Qarnizonu tam orta məktəbinin və Naxçıvan Qızlar Liseyinin komandaları isə ikinci və üçüncülüklə kifayətləniblər.

9 komandanın mübarizə apardığı “Vətənin müdafiəsinə hazıram” poliatlon çoxnövçülüyü üzrə yarışı Naxçıvan şəhər komandası birinci yerdə başa vurub. Digər iki pillədə Babək və Ordubad rayon komandaları qərarlaşıblar.
Sonda qalib idmançılar və komandalar mükafatlandırılıb. Mükafatları Naxçıvan Muxtar Respublikası Şahmat Federasiyasının sədri Seymur Talıbov, Naxçıvan Muxtar Respublikasının təhsil naziri Rəhman Məmmədov, gənclər və idman naziri Azad Cabbarov, Səfərbərlik və Hərbi Xidmətə Çağırış üzrə Dövlət Xidmətinin rəisi, general-mayor Səxavət Salmanov, Yüngül Atletika Federasiyasının sədri Rövşən Məmmədov və Basketbol Federasiyasının sədri Mahir Əliyev təqdim ediblər.

Naxçıvan Şəhər Peşə Liseyində "Qazanxana maşinisti" kurslarını bitirmiş müdavimlərlə görüş keçirilib. Tədbiri giriş sözü ilə Naxçıvan Muxtar Respublikası Təhsil Nazirliyinin Orta ixtisas təhsili müəssisələri və peşə məktəbləri ilə iş üzrə şöbəsinin baş məsləhətçisi Elnur Qasımov açıb. Bildirib ki, muxtar respublikada texniki peşə təhsili sistemində şəbəkənin optimallaşdırılması istiqamətində mühüm tədbirlər həyata keçirilib, bu müəssisələrin maddi-texniki və tədris bazası yaxşılaşdırılıb, təhsilin məzmunu və təlim-tədris prosesləri müasir tələblər baxımından yenidən qurulub, peşə təhsili müəssisələrində 1, 2 və 3 aylıq kursların təşkilinə başlanılıb.

Vurğulanıb ki, payız-qış mövsümündə fasiləsiz fəaliyyətin təmin olunması üçün avqustun 4-də Naxçıvan Muxtar Respublikası Ali Məclisində muxtar respublikada 2018-2019-cu illərin payız-qış mövsümünə ­hazırlıq və qarşıda duran vəzifələrlə əlaqədar keçirilən müşavirədə aidiyyəti təşkilatlara müvafiq tapşırıqlar verilib.