Naxçıvan Muxtar Respublikası Təhsil və Mədəniyyət nazirliklərinin birgə təşkilatçılığı ilə ümumtəhsil məktəblərinin sinifdənxaric və məktəbdənkənar fəaliyyətlərinin qiymətləndirilməsi məqsədilə  “Məktəblilərin dram müsabiqəsi”  keçirilir.

İlk müsabiqə 16 dekabr 2019-cu il tarixdə Naxçıvan şəhər ümumtəhsil məktəblərinin V-XI sinif şagirdlərinin iştirakı ilə keçirilmişdir. Müsabiqədə Naxçıvan Şəhər Təhsil Şöbəsinin tabeliyində olan 17 ümumtəhsil məktəbi tərəfindən “Oxunması zəruri olan kitablar”dan əsərlər, Azərbaycan və dünya ədəbiyyatından seçilmiş nümunələr əsasında hazırlanmış parçalar səhnələşdirilmiş və ya kompozisiya şəklində təqdim olunmuşdur.

16 dekabr  2019-cu  il  tarixdə Naxçıvan  Muxtar   Respublikası  Mədəniyyət  Nazirliyi, Naxçıvan  Dövlət  Rəsm  Qalereyası və Şahbuz Rayon Təhsil Şöbəsinin birgə təşkilatçılığı ilə  birlikdə   Şahbuz şəhər  2   nömrəli   tam  orta  məktəbdə   rayonun  ümumtəhsil  məktəblərinin  VI-XI  sinif  şagirdləri  arasında “Mən  bu  yurdun  övladıyam”  adlı rəsm  müsabiqəsi  keçirildi. Müsabiqənin  keçirilməsində  məqsəd  böyüməkdə  olan  nəslə qədim  və müasir  Naxçıvanın daha  dərindən öyrədilməsi, istedadlı  yeniyetmə və gənclərin  aşkar  edilib  üzə çıxarılması və  təsviri   incəsənət  dərslərinin  tədrisinin  yüksəldilməsindən  ibarətdir.

16 dekabr 2019-cu il tarixdə Kəngərli Rayon Təhsil Şöbəsinin  və Uşaq-Gənclər Yaradıcılıq Mərkəzinin birgə təşkilatçılığı ilə “31 Dekabr – Dünya Azərbaycanlılarının Həmrəylik Günü və Yeni il bayramı” münasibətilə rayon ümumtəhsil məktəblərinin şagirdləri arasında rəsm müsabiqəsi keçirilib.

Müsabiqənin keçirilməsində əsas məqsəd rayonun ümumtəhsil məktəblərində təhsil alan xüsusi istedada malik şagirdləri üzə çıxarmaq, asudə vaxtın səmərəli təşkili, Azərbaycanın zəngin milli mədəniyyətinin təbliği, məktəblilərin yaradıcı qabiliyyətlərinin reallaşdırılması üçün əlvərişli şəraitin yaradılmasıdır.