Muxtar respublikada istedadlı şagirdlərin üzə çıxarılması məqsədilə müxtəlif müsabiqələr və bilik yarışları içərisində olimpiadalar xüsusi ilə seçilir. Bu tədris ilində də məktəblilərin muxtar respublika və respublika fənn olimpiadaları keçirilmişdir. Muxtar respublika üzrə 121 məktəbli Respublika fənn olimpiadasının final turuna vəsiqə qazanmışdır.

Mayın 31-də Naxçıvan şəhər 4 nömrəli tam orta məktəbdə məktəblilərin Respublika fənn olimpiadalarının Azərbaycan dili və ədəbiyyat, tarix, coğrafiya fənləri üzrə final turu keçirilib. Olimpiada zamanı hər üç fənn üzrə sualları cavablandırmaq üçün şagirdlərə 3 saat vaxt verilib.

Gənc nəslin milli dövlətçilik, vətənpərvərlik ruhunda tərbiyəsini yüksəltmək, istedadlı məktəbliləri aşkara çıxarmaq, mədəniyyət və ədəbiyyatımızın inkişafı və təbliğini təmin etmək məqsədilə muxtar republika ümumtəhsil məktəblərinin şagirdləri arasında “28 May-Respublika günü”nə həsr olunmuş şeir müsabiqəsi keçirilib.

Mayın 27-də Heydər Əliyev Uşaq-Gənclər Yaradıcılıq Mərkəzində keçirilən müsabiqədə Təhsil Nazirliyinə birbaşa tabe məktəblər və şəhər və rayon ümumtəhsil məktəbləri üzrə 21 şagird iştirak edib.

Naxçıvan Muxtar Respublikası təhsil və mədəniyyət nazirliklərinin birgə təşkilatçılığı ilə Naxçıvan Dövlət Rəsm Qalereyasında 27 may 2021-ci il tarixdə Naxçıvan Qızlar Liseyi, Naxçıvan şəhər 1, 15, 16 və 17 nömrəli tam orta məktəblər üzrə 20 nəfər şagirdin iştirakı ilə açıq dərs keçirilib.

Naxçıvan Qızlar Liseyinin tarix müəllimi Allahverdiyeva Səkinə “Azərbaycanın dilbər guşələri” mövzusunda keçdiyi açıq dərsdə şagirdlərə vətənimizin gözəl və rəngarəng təbiəti haqqında geniş məlumat verib.

Şagirdləri maraqlandıran suallar Dövlət Rəsm Qalereyasının əməkdaşı tərəfindən cavablandırılıb.

Sonda şagirdlərə qalereyada sərgilənən rəsm əsərləri haqqında geniş məlumat verilib.