Naxçıvan Şəhər Təhsil Şöbəsi, Gənclər və İdman İdarəsi və Naxçıvan Muxtar Respublikası Hava və Ekstremal İdman Növləri Federasiyasının birgə təşkilatçılığı ilə ümummilli lider Heydər Əliyevin anadan olmasının 98-ci ildönümü münasibətilə 16 yaşdan yuxarı oğlan idmançılar arasında süni divara dırmanma idman yarışı keçirilib. Yarışda çıxış edənlər yarışın keçirilmə məqsədi haqqında idmançılara geniş məlumat verərək uğurlar arzulayıblar. Süni Divar İdman Mərkəzində keçirilən birinciliyin yekununa əsasən Nihad Əhmədov I yerə, Canpolad Məmmədov II yerə, Samiq Həşimov isə III yerə layiq görülüb. Sonda yer tutan və fərqlənən idmançılara təşkilatçıların diplom və fəxri fərmanları təqdim edilib. Qeyd edək ki, I, II və III yerləri tutan idmançılar 7 may 2021-ci il tarixdə keçiriləcək muxtar respublika mərhələsində Naxçıvan şəhərini təmsil edəcəklər.

Naxçıvan Muxtar Respublikası Ali Məclisinin Sədri tərəfindən təsdiq edilmiş “2021-2025-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı” və “2021-2025-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası Təhsil Nazirliyi tərəfindən daim diqqətdə saxlanılır. Mayın 5-də Naxçıvan şəhər 11 və 15 nömrəli tam orta məktəblərdə peşə ixtisasları, o cümlədən sağlamlıq imkanları məhdud uşaqların maraq və bacarıqları nəzərə alınmaqla peşə təhsilinə cəlb edilməsi ilə bağlı növbəti maarifləndirici tədbir keçirilib. Tədbirdə Təhsil Nazirliyi Aparatının əməkdaşı, Naxçıvan Şəhər Peşə Liseyinin direktoru və IX-XI sinif şagirdləri iştirak ediblər.

Ümumtəhsil məktəblərinin VI və VII sinif şagirdləri arasında keçirilən  Məktəblilərarası fənn müsabiqələrinin I mərhələsinin nəticələri elan olunub. Naxçıvan Muxtar Respublikasında ilk dəfə olaraq keçirilən müsabiqədə 147 muxtar respublika məktəblisi final mərhələdə iştirak etmək hüququ qazanıb. Müsabiqənin final mərhələsinin may ayının sonunda keçirilməsi nəzərdə tutulmuşdur.