Bu gün muxtar respublikanın ümumtəhsil məktəblərinin 9-11-ci sinif şagirdləri arasında sınaq imtahanları aparılıb.

Sınaq  imtahanlarının keçirilməsinin məqsədi şagirdlərin bilik və bacarıqlarını daha da yüksəltmək, onların test kitabçaları üzərində sərbəst işləmə vərdişlərini artırmaqdır. Naxçıvan şəhərinin və muxtar respublikanın rayonlarında təşkil olunan sınaq imtahanlarının obyektiv keçirilməsi üçün qeyri-ixtisas müəllimləri cəlb olunub

Heydər Əliyev Uşaq-Gənclər Yaradıcılıq Mərkəzində “Zərərli vərdişlərə yox deyək, həmişə sağlam olaq” devizi altında Naxçıvan şəhər ümumtəhsil məktəblərinin VII-IX sinif şagirdləri arasında stolüstü tennis birinciliyi keçirilmişdir. Heydər Əliyev Uşaq-Gənclər Yaradıcılıq Mərkəzi, Naxçıvan Şəhər Təhsil Şöbəsi və Naxçıvan Şəhər Gənclər və İdman İdarəsinin birgə təşkilatçılığı ilə keçirilən yarışda 17 komanda üzrə (tərkibi 3 oğlan olmaqla) 51 şagird iştirak etmişdir. Birinciliyin yekununa əsasən, 5 nömrəli tam orta məktəbin komandası I yerə, 10 nömrəli tam orta məktəbin komandası II yerə, 2 və 15 nömrəli tam orta məktəblərin  komandaları isə III yerə layiq görülmüşlər.

Sonda qalib komandalar təşkilatçıların diplomları ilə mükafatlandırılmışlar.

Naxçıvan şəhər 3 nömrəli tam orta məktəbin idman zalında məktəblilərin asudə vaxtlarının səmərəli təşkili məqsədilə Naxçıvan şəhər  ümumtəhsil məktəblərinin komandaları arasında “Şən startlar” əyləncəli idman oyunu keçirilmişdir. Tədbirin açılış mərasimində çıxış edənlər oyunun keçirilmə məqsədi haqqında geniş məlumat vermiş və komandalara uğurlar arzulamışlar, Naxçıvan Şəhər Təhsil Şöbəsi, Naxçıvan Şəhər Gənclər və İdman İdarəsinin birgə təşkilatçılığı ilə keçirilən oyunda 17 komandada tərkibi 3 oğlan     3 qız olmaqla 102 şagird iştirak etmişdir.