Naxçıvan şəhər 9 nömrəli tam orta məktəbin şagirdləri üçün Bəhruz Kəngərlinin Ev Muzeyində “7 fevral-Bəhruz Kəngərlinin Anım Günü” mövzusunda açıq dərs keçirilib.
Açıq dərsi keçən baş fond mühafizi, elmi işçi Səmanə Rüstəmova rəssamın həyat və yaradıcılığı haqqında şagirdlərə geniş məlumat verib. Bildirib ki, XX əsr Azərbaycan rəsm sənətinin görkəmli nümayəndəsi Bəhruz Kəngərli qısa ömür yaşasa da zəngin irs yaratmış, Azərbaycan təsviri sənətində realist, portret və mənzərə rəsm yaradıcılığının əsasını qoymuşdur. Rəssamın 2000-ə yaxın mövzusu janr etibarilə müxtəlif və rəngarəng əsərlərindən ibarət bədii irsi geniş ictimaiyyətin nəzər-diqqətini cəlb etmiş, ardıcıl olaraq toplanıb sərgi və muzey ekspozisiyalarının bəzəyinə çevrilmişdir. Öz vətənini bütün varlığı ilə sevən və ona bağlı olan bir sənətkar olaraq rəssamın əsərlərində vətən təbiəti, tarixi abidələri özünəməxsus yer tutmuşdur. Bu gün də Bəhruz Kəngərlinin Azərbaycan mədəniyyəti xəzinəsinə daxil olan zəngin irsi xalqımızın milli sərvəti kimi gələcək nəsillər üçün qorunub saxlanılır.
Naxçıvan Şəhər Təhsil Şöbəsi və Heydər Əliyev Uşaq-Gənclər Yaradıcılıq Mərkəzinin birgə təşkilatçılığı ilə Naxçıvan şəhər ümumtəhsil məktəblərinin VI sinif şagirdləri arasında “İngilis dilini necə öyrənirik?” devizi altında bilik yarışına start verilib. Bilik yarışlarının keçirilməsində məqsəd şagirdlərin bilik və intellektual səviyyələrinin yüksəldilməsi ilə yanaşı dərnəklərə olan marağın artırılmasıdır.
Azərbaycan ədəbiyyatının görkəmli nümayəndəsi, dahi şair Nizami Gəncəvinin anadan olmasının 880 illiyinin tamam olması və ölkə başçısının Sərəncamı ilə 2021-ci ilin “Nizami Gəncəvi” ili elan edilməsi ilə əlaqədar olaraq Culfa Rayon Təhsil Şöbəsinin təşkilatçılığı ilə Culfa şəhər 2 nömrəli tam orta məktəbdə Nizami Gəncəvinin həyat və yaradıcılığına həsr olunmuş kitab müzakirəsi keçirilib.
Cəlil Məmmədquluzadənin Cəlilkənddə Xatirə Muzeyində Ələkli kənd tam orta məktəbinin şagirdlərinə “Mirzə Cəlilin fəaliyyəti” mövzusundada açıq dərs keçirilib.
