Naxçıvan Muxtar Respublikası Təhsil Nazirliyinin qrafikinə uyğun olaraq Naxçıvan Şəhər Təhsil Şöbəsinin təşkilatçılığı ilə Heydər Əliyev Muzeyində       Naxçıvan şəhər 17 nömrəli tam orta məktəbin 15 şagirdinin iştirakı ilə açıq dərs keçirilib.

Muzeyin əməkdaşı Gülnar Quluzadənin “Ümummilli lider Heydər Əliyev və Naxçıvan muxtariyyəti” mövzusunda keçdiyi açıq dərsdə ümummulli lider Heydər Əliyevin siyasi fəaliyyəti haqqında şagirdlərə məlumat verilib. Bildirilib ki, ulu öndər Heydər Əliyev böyük mütəfəkkirlərin, sərkərdələrin, dahilərin vətəni olan Naxçıvanın yetişdirdiyi şəxsiyyətlərin fövqündə dayanan əvəzolunmaz liderdir. O, bütün həyatı boyunca Vətəninə, xalqına bağlılıq nümunəsi göstərib, ölkəmizin, o cümlədən doğulub boya-başa çatdığı Naxçıvanın inkişafı, yüksəlişi, təhlükəsizliyinin təmini üçün əlindən gələni əsirgəməyib.

Naxçıvan Şəhər Təhsil Şöbəsinin təşkilatçılığı ilə Naxçıvan Bayraq Meydanı Muzeyində 05 fevral 2021-ci il tarixdə şəhər 8, 10, 12, və 15 nömrəli tam orta məktəblər üzrə 15 şagirdin iştirakı ilə ekskursiya keçirilib.

Muzeyin bələdçisi şagirdlərə bildirib ki, Naxçıvan Azərbaycanın milli dövlətçilik tarixində mühüm yer tutur. Qədim tarixə, zəngin dəyərlərə malik xalqımızın yenilməzlik ruhu bu gün milli siyasət və ideologiyamızın ən mühüm simvolu olan üçrəngli bayrağımızda öz təsdiqini tapmışdır.

Naxçıvan şəhər A.Nəzərəliyev adına 16 nömrəli tam orta məktəbin X sinif  şagirdləri üçün Çağırışaqədərki Hazırlıq fənnindən “Kalaşnikov silahının natamam sökülüb-yığılması” mövzusunda açıq dərs keçirilib.

Məktəbin hərbi rəhbəri Salman Novruzov tərəfindən əvvəlcə mövzu və  təhlükəsizlik qaydaları ətraflı izah edilib. Kalaşnikov silahının sökülüb-yığılma ardıcıllığı əyani olaraq şagirdlərə göstərilib. Açıq dərs müddəti ərzində şagirdlər ardıcıllığı təhlükəsizlik qaydalarına əməl etməklə normativlər əsasında fəallıqla yerinə yetirib.