25 dekabr 2020-ci il tarixdə bütün muxtar respublika ümumtəhsil məktəblərinin IX-XI siniflərində təhsil alan şagirdlər üçün sınaq imtahanı keçirilib. Sınaq imtahanı buraxılış imtahanı formatında təşkil edilib.

Sınaq imtahanında IX siniflər üçün Azərbaycan dili fənni üzrə 2 mətn - hər mətndən 5 qapalı, 5 açıq test tapşırıqları, Xarici dil üzrə 1 dinləmə mətni və 1 yazılı mətn olmaqla 15 test tapşırığı, Riyaziyyat fənni üzrə isə 10 açıq test tapşırığı verilib.

Ordubad şəhər İnternat tam orta məktəbində sosial qayğıya ehtiyacı olan məktəblilərlə görüş keçirilib.

Tədbirdə Ordubad Rayon İcra Hakimiyyətinin başçısı Elşad Məmmədov, Naxçıvan Muxtar Respublikasının Təhsil naziri Rəhman Məmmədov, Ailə Qadın və Uşaq Problemləri üzrə Dövlət Komitəsinin sədri Ramilə Seyidova çıxış edib. Bildirilib ki, muxtar respublikada yaşayan bütün kateqoriyadan olan uşaqlara, o cümlədən valideynlərini itirmiş və valideyn himayəsindən məhrum olmuş uşaqlara diqqət və qayğı göstərilir. Onların təhsili, milli  ruhda təlim-tərbiyəsi, dünyagörüşünün formalaşması, sağlamlıqlarının  qorunması daim diqqət mərkəzində saxlanılır.

Sədərək kənd 1 nömrəli tam orta məktəbdə Sədərək Rayon Təhsil Şöbəsi, Polis Şöbəsi, Gənclər və İdman İdarəsinin təşkilatçılığı ilə yetkinlik yaşına çatmayan uşaqların milli mənəvi dəyərlər və vətənpərvər ruhda tərbiyə edilməsi, asudə vaxtlarında idman yarışlarının təşkil edilməsi və idmana cəlb edilmələri məqsədilə profilaktik tədbir keçirilib.

Tədbirdə Təhsil Şöbəsinin əməkdaşları, Sədərək Rayon Polis Şöbəsinin Yetkinlik Yaşına Çatmayanların Proflaktik İşinin Təşkili Şöbəsi üzrə inspektoru, Polis Kapitanı Qulu Quliyev, İcra hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Nazim Mehdiyev və Gənclər və İdman İdarəsinin müdiri Polad Rzazadə iştirak edib.