Muxtar respublikanın sürətli sosial-iqtisadi inkişafı, yeni sənaye və xidmət sahələrinin yaradılması, həmin sahələrdə müasir informasiya texnologiyalarının tətbiqi təhsil sahəsində, xüsusən də dəqiq elmlər sahəsində dərin bilik verilməsinə tələbatı artırır. Bununla əlaqədar muxtar respublikamızda dəqiq elmlər sahəsi üzrə kadrların hazırlanması diqqətdə saxlanılmış, təhsilə göstərilən hərtərəfli qayğının daha bir nümunəsi olaraq Naxçıvan Muxtar Respublikası Ali Məclisi Sədrinin 2015-ci il 14 aprel tarixli Sərəncamı ilə Şərur şəhərində Fizika-Riyaziyyat Təmayüllü Lisey yaradılmışdır.Yaradılan əlverişli tədris şəraitinin nəticəsidir ki, qəbulu müsabiqə yolu ilə aparılan liseydə təhsil almaq üçün müraciət edən şagirdlərin sayı hər il artmaqdadır.

Naxçıvan şəhər və Babək rayon ümumtəhsil məktəblərinin IX sinif şagirdləri arasında orta ixtisas təhsilinə marağın artırılması məqsədilə Naxçıvan Dövlət Texniki Kollecində 11 iyun 2021-ci il tarixdə “Açıq qapı” günü təşkil olunmuşdur.

Tədbirin keçirilməsinin məqsədi orta ixtisas təhsili haqqında şagirdləri məlumatlandırmaq, həmçinin onları Naxçıvan Dövlət Texniki Kollecinin təhsil mühiti ilə yaxından tanış etmək, kollecdə kadr hazırlığı aparılan ixtisaslar və digər lazımi məlumatlar barədə maarifləndirməkdən ibarət olub.

2020-2021-ci tədris ilində muxtar respublika muzeyləri, Azərbaycan Milli Elmlər Akademiyasının Naxçıvan Bölməsi və Şahmat Mərkəzi ilə ümumtəhsil məktəbləri arasında ümumilikdə 21 interaktiv dərs keçirilib. Azərbaycanın tarixi, mədəniyyəti, görkəmli şəxsiyyətləri ilə bağlı keçirilən interaktiv dərslər şagirdlərin tariximizlə bağlı biliklərinin, dünyagörüşlərinin artmasında mühüm rol oynayır. İyunun 11-də cari tədris ilinin sonuncu interaktiv dərsi keçirilmişdir. Bu dərs 15 iyun Milli Qurtuluş Gününə həsr olunduğundan Heydər Əliyev Muzeyi ilə “Ulu öndər Heydər Əliyev Azərbaycan xalqının xilaskarıdır” mövzusunda aparılmışdır.