Sədərək Rayon Təhsil Şöbəsinin tabeliyində olan təhsil müəssələrinin kitabxanaları zəruri avadanlıqlarla təchiz olunmuş, fondu zənginləşdirilmiş, “Oxunması zəruri olan kitablar” və bədii ədəbiyyat nümunələri ilə təmin olunmuşdur. Yaradılan şəraitdən səmərəli istifadə olunmasını, eləcə də mütaliənin şəxsiyyətin formalaşmasında, milli-mənəvi və ümumbəşəri dəyərlərin təşəkkülündə müstəsna rolunu nəzərə alaraq, aprel ayı muxtar respublikanın ümumtəhsil məktəblərində “Mütaliə aylığıˮ elan edilmişdir. Naxçıvan Muxtar Respublikası Təhsil Nazirliyinin “Mütaliə aylığıˮnın keçirilməsi ilə bağlı Tədbirlər Planına uyğun olaraq Sədərək rayon ümumtəhsil məktəblərində Eynəli bəy Sultanovun Məqalələr kitabının müzakirəsi keçirilib.
Şərur Rayon Təhsil Şöbəsi və Gənclər və İdman İdarəsinin birgə təşkilatçılığı ilə rayon məktəbliləri arasında “Xəmsəˮ Milli İntellektual Bilik Oyununun rayon mərhələsi keçirilib. Şərur şəhər 2 nömrəli tam orta məktəbdə təşkil olunan yarışda 6 komanda üzrə 30 şagird iştirak edib. Müsabiqədə Danyeri kənd tam orta məktəbin “Xarı bülbül ˮ komandası I yerə, Şəhriyar kənd tam orta məktəbin “Simruqˮ komandası II yerə, Şərur şəhər 2 nömrəli tam orta məktəbin “ Qarabağ ˮ komandası isə III yerə layiq görülüb.
“Xəmsə” Milli İntellektual Oyununun Şahbuz rayon mərhələsi keçirilmişdir. Şahbuz şəhər 1, 2 nömrəli, Keçili, Sələsüz, Kükü, Badamlı, Kolanı və Yuxarı Qışlaq kənd tam orta məktəblərinin VIII-XI sinif şagirdlərindən ibarət komandalar arasında keçirilən yarış 5 raunddan ibarət olub. Yarışın sonunda Sələsüz kənd tam orta məktəbin “Polad” komandası I, Kükü kənd tam orta məktəbin “Qarabağ” komandası II, Keçili kənd tam orta məktəbin “Çınqıllı” komandası isə III yerə layiq görülüb. Qalib komandalar təşkilatçılar tərəfindən diplomlarla təltif olunublar.
Şahbuz Rayon Təhsil Şöbəsi, Naxçıvan Muxtar Respublikası Atletika Federasiyası Şahbuz rayon bölməsi və Uşaq-Gənclər İdman Məktəbinin təşkilatçılığı ilə rayon ümumtəhsil məktəblərinin şagirdləri arasında atletika üzrə zonalar arası təsnifat yarışının final mərhələsi keçirilib. yarışın keçirilməsində məqsəd idmanın kütləviliyinə nail olmaq, şagirdlərin müxtəlif idman növlərinə olan marağını artırmaq, sağlam böyümələrinə zəmin yaratmaq və rayon yığma atletika komandasına yeni idmançıların seçilməsini təmin etmək olub. Şahbuz şəhər 1 nömrəli tam orta məktəbin stadionunda keçirilən yarışda 14 məktəb üzrə 36 şagird 400 və 800 metr məsafələrə qaçışda, yadro itələməkdə və nizə atmada öz qüvvələrini sınamış və rayon yığma atletika komandasının yeni üzvləri müəyyənləşdirilmişdir. Yarışın qaliblərinə yarışın təşkilatçıları tərəfindən diplomlar təqdim olunmuşdur.
“Mütaliə aylığı” ilə əlaqədar hazırlanmış tədbirlər planına uyğun olaraq Şahbuz şəhər 2 nömrəli tam orta məktəbdə görkəmli Azərbaycan yazıçısı Məmməd Səid Ordubadinin “Qılınc və qələm” romanı əsasında inşa yazı müsabiqəsi keçirilib. Müsabiqədə IX-XI sinif şagirdləri iştirak edib. Nəticələrə görə I yeri Sələsüz kənd tam orta məktəbin şagirdi Nurgül Quliyeva, II yeri Şahbuz şəhər 1 nömrəli tam orta məktəbin şagirdi Könül Vəlizadə, III yeri isə Şahbuzkənd tam orta məktəbin şagirdi Bahar Həsənəliyeva tutub. Qaliblərə Təhsil Şöbəsinin diplomları təqdim olunub.
