22 may 2020-ci il tarixdə Naxçıvan Şəhər Təhsil Şöbəsinin və Naxçıvan Dövlət Tarix Muzeyinin birgə təşkilatçılığı əsasında Naxçıvan şəhər ümumtəhsil məktəblilərinin iştirakı ilə “28 May-Respublika günü”nə həsr olunmuş “Şərqdə ilk dünyəvi demokratik dövlət olan Azərbaycan Xalq Cümhuriyyəti” mövzusunda virtual ekskursiya təşkil olunmuşdur.
Naxçıvan Muxtar Respublikası Texniki Yaradıcılıq Mərkəzi mövcud vəziyyətlə əlaqədar olaraq dərnək məşğələlərini, müsabiqə və yarışmalarını onlayn qaydada həyata keçirir. Belə müsabiqələrdən biri də 18-22 may tarixlərində Mərkəzin Rəsm dərnəyinin üzvləri arasında keçirilən “1 iyun-Uşaqların Beynəlxalq Müdafiəsi Günü”nə həsr edilmiş rəsm müsabiqəsidir. Müsabiqənin keçirilməsində məqsəd şagirdlərin evdə qaldığı müddətdə asudə vaxtlarını səmərəli təşkil etmək, onları yaradıcılığa daha da həvəsləndirmək idi.
Məlumdur ki, Azərbaycanda, o cümlədən muxtar respublikada yeni növ koronavirus (COVİD-19) infeksiyasının yayılmasının qarşısının alınması məqsədilə məktəblərdə təhsil müvəqqəti dayandırılmışdır. Naxçıvan Muxtar Respublikası Təhsil Nazirliyinin tədris prosesinin dayandırıldığı müddətdə təlim-tədris prosesinin məsafədən təşkilinə dair tövsiyəsi əsasında Sədərək rayon ümumtəhsil məktəblərində və Uşaq Gənclər Şahmat Məktəbində tədris onlayn şəkildə davam etdirilir.
Mayın 22-də Naxçıvan Muxtar Respublikası Təhsil Nazirliyinin təşkilatçılığı ilə Texniki Yaradıcılıq Mərkəzinin dərnək rəhbərləri və dərnək üzvləri arasında “Oxunması zəruri olan kitabların siyahısı”na daxil olan Məhəmməd Tağı Sidqinin “Məktəb hekayələri” əsərinin onlayn müzakirəsi keçirilib.
