Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən dövlət ümumi təhsil müəssisələrinə işə qəbul üçün noyabrın 6-sı elan edilən müsabiqənin test imtahanlarına yanvarın 9-da start verilib.

Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın mətbuat xidmətindən NUHÇIXAN-a verilən məlumata görə, müsabiqəyə çıxarılan 229 vakant vəzifənin tutulması üçün 283 namizəd sənəd təqdim edib. Ən çox İbtidai sinif müəllimliyi (44), İnformatika (38), İngilis dili (33), Azərbaycan dili (29) və Fiziki tərbiyə (29) ixtisasları üzrə müraciətlər qeydiyyata alınıb.

Naxçıvan Muxtar Respublikası Təhsil Nazirliyi və Rəssamlar Birliyinin birgə təşkilatçılığı ilə “Məktəblilərin təsviri və dekorativ-tətbiqi sənət  müsabiqəsi” başlayıb.  Müsabiqə yanvarın 8-dən 24-dək  muxtar respublikanın  bütün  şəhər və rayon ümumtəhsil  məktəblərinin  şagirdləri arasında nəzərdə tutulub. İlk olaraq Heydər Əliyev Uşaq-Gənclər Yaradıcılıq Mərkəzində  Naxçıvan Şəhər Təhsil Şöbəsinin  tabeliyində olan ümumtəhsil  məktəblərinin şagirdləri arasında keçirilib.

09 yanvar 2020-ci il tarixdə “Xan Sarayı” Dövlət-Tarix Memarlıq Kompleksində 13 nömrəli tam orta məktəbin şagirdlərinin  iştirakı ilə “Orta əsr memarlıq inciləri: Əcəmi Naxçıvani və Naxçıvan abidələri” mövzusunda Naxçıvan Şəhər Təhsil Şöbəsinin metodisti, 13 nömrəli tam orta məktəbin tarix müəllimi İbrahimova Təhminə açıq dərs keçmişdir. Açıq dərsdə qeyd olunmuşdur ki, Azərbaycanın  tarixində mühüm  yeri olan Naxçıvan qədim abidələrlə zəngindir.

Yanvarın 8-də Naxçıvan Muxtar Respublikası Təhsil Nazirliyində “2019-ci ilin yekunları və qarşıda duran vəzifələr”ə dair kollegiya iclası keçirilmişdir.

Kollegiya iclasında Naxçıvan Muxtar Respublikasının Təhsil naziri Rəhman Məmmədov məruzə edərək bildirmişdir ki, Naxçıvan Muxtar Respublikası Ali Məclisi Sədrinin diqqət və qayğısı sayəsində təhsil müəssisələrinin maddi-tədris bazasının möhkəmləndirilməsi sahəsində işlər 2019-cu ildə də davam etdirilmişdir. Ötən müddət ərzində Naxçıvan şəhərində 5 nömrəli, Şərur rayonunda Muğanlı, Kərimbəyli, Xələc, Yeni Havuş, Babək rayonunda Kültəpə, Gülşən­abad, Ordubad rayonunda Dəstə, Şahbuz rayonunda Türkeş, Kəngərli rayonunda Böyükdüz kənd tam orta məktəbləri üçün binalar tikilərək və ya əsaslı şəkildə yenidənqurularaq istifadəyə verilmişdir. Hazırda Şərur rayonunda Muğancıq Mehrab, Ordubad rayonunda isə Vənənd kənd tam orta məktəbləri üçün binaların tikintisi və ya yenidənqurulması davam etdirilir.