Naxçıvan şəhər 11 nömrəli tam orta məktəbin şagirdləri Xatirə Muzeyində “Azərbaycanın Milli Qəhrəmanı İbrahim Məmmədov” mövzusunda keçirilən açıq dərsdə iştirak ediblər.

Muzeyin bələdçisi Tamara Novruzova Azərbaycanın Milli Qəhrəmanı Məmmədov İbrahim İsmayıl oğlu haqqında şagirdlərə məlumat verib. Bildirib ki, Azərbaycan Respublikasının ən yüksək fərqlənmə dərəcəsi “Azərbaycanın Milli Qəhrəmanı” fəxri adıdır. Bu ad ölkənin müstəqilliyi və tərəqqisi naminə xalq qarşısında müstəsna xidmətlərə və rəşadətə görə verilir. Qarabağ müharibəsi yüzlərlə milli qəhrəman yetişdirmişdir ki, onlardan biri də Naxçıvanlı Milli Qəhrəman Məmmədov İbrahim İsmayıl oğludur. Bildirilib ki, İbrahim Məmmədov Murovdağ uğrunda döyüşlərdə fədakarlıqlar göstərmiş, tabeçiliyində olan şəxsi heyətlə Murovdağın qəhrəmanlıq səlnaməsinə parlaq və yaddaqalan səhifələr yazmışdır. Xalq şairi Məmməd Araz demişdir; - Murovdağ döyüşçüsünün bir gününü yaşamaq bir ömrə bərabərdir.

Culfa rayon Şurud kənd tam orta məktəbində Nizami Gəncəvinin 880 illik yubileyi münasibətilə tədbir keçirilib. Tədbiri məktəbin direktoru Babək Kalbalıyev açaraq yalnız Azərbaycan və türk ədəbiyyatına deyil, həmçinin dünya ədəbiyyatına əvəzsiz töhfələr bəxş etmiş mütəfəkkir şairin bədii irsindən söz açmışdır. O bildirmişdir ki, Nizami Gəncəvi humanizm və bəşəri dəyərlərdən yoğrulmuş yaradıcılığı ilə zamanın fövqündə dayanaraq bütün nəsillərin müasirinə çevrilib.

Gənc nəsildə vətənpərvərliyin, tarixə, milli kökə bağlılığın və dünyagörüşün formalaşdırılmasına xidmət edən kitablar haqqında Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamına əsasən “Oxunması zəruri kitabların siyahısı” təyin edilmişdir. Bu səbəbdən də məktəb kitabxanalarında güşələr təşkil olunmuş, kitablar oxucuların ixtiyarına verilmişdir. Eyni zamanda təhsil müəssisələrində şagirdlərin bu kitablara diqqətini cəlb etmək üçün, müzakirələr təşkil olunmuşdur. Bu müzakirələrdən biri də bu gün Babək rayon Məmmədrzadizə kənd tam orta məktəbində keçirilmişdir.