19 yanvar 2021-ci il tarixdə Heydər Əliyev Uşaq-Gənclər Yaradıcılıq Mərkəzinin bir qrup dərnək üzvü 20 Yanvar faciəsi ilə əlaqədar torpaqlarımızın ərazi bütövlüyü uğrunda canlarından keçən şəhidlərin xatirəsini əziz tutmaq, onları yad etmək məqsədi ilə Xatirə muzeyində və Şəhidlər Xiyabanında olublar. Xatirə muzeyinə ekskursiya zamanı dərnək üzvlərinə şəhidlərin şəxsi əşyaları, onların keçdiyi döyüş yolu haqqında ətraflı məlumat verilib.

21 yanvar 2021-ci il tarixdə Naxçıvan Şahmat Mərkəzində “Naxçıvan şahmatçılarının oyunlarının təhlili” və “Məsələ həlli” mövzularında növbəti interaktiv dərs keçirilib. Dərsi beynəlxalq dərəcəli hakim Emin Hacıyev aparıb.

Emin Hacıyev elektron şahmat proqramları, “Siciliya müdafiəsi” və “Etudlərin həlli” haqqında ətraflı məlumat verərək bildirib ki, müasir şahmatın öyrənilməsində elektron şahmat proqramlarından mütləq istifadə etmək lazımdır. “Lichess.org”, “chess.com” kimi internet səhifələrindən istifadə bu gün muxtar respublika məktəblərində geniş tətbiq olunur. Bundan başqa Naxçıvan Şahmat Federasiyasının “Youtube” səhifəsində dərslər yerləşdirilib və eyni zamanda CD formasında məktəblərə çatdırılıb.

Görkəmli alim, bacarıqlı elm və təhsil təşkilatçısı

Görkəmli alim, Azərbaycan Milli Elmlər Akademiyasının həqiqi üzvü, Əməkdar elm xadimi, tarix elmləri doktoru, professor, bacarıqlı elm və təhsil təşkilatçısı, AMEA Naxçıvan Bölməsinin sədri İsmayıl Muxtar oğlu Hacıyevin 70 yaşı tamam olur.

Naxçıvan Muxtar Respublikası Ali Məclisinin Sədri yanında Bilik Fondunun Himayəçilik Şurasının Sədri Vasif Talıbov akademik İsmayıl Hacıyevin 70 illik yubileyi münasibətilə Tədbirlər Planı  təsdiq etmişdir.

Yanvarın 21-də AMEA Naxçıvan Bölməsi ilə muxtar respublikanın  ümumtəhsil məktəbləri arasında görkəmli alim, akademik İsmayıl Hacıyevin 70 illik yubileyi münasibətilə “Akademik İsmayıl Hacıyev – 70” mövzusunda açıq dərs keçirilib.

AMEA-nın müxbir üzvü Hacı Fəxrəddin Səfərli tərəfindən keçirilən dərsdə şagirdlərə bildirilib ki, 21 yanvar 1951-ci ildə Culfa rayonunun Xanağa (indiki Xanəgah) kəndində müəllim ailəsində dünyaya göz açan İsmayıl Hacıyev gərgin əməyi və zəhməti hesabına sıravi orta məktəb müəllimliyindən akademikliyə qədər yüksəlmiş, Azərbaycan tarix elminin inkişafında mühüm xidmətlər göstərmişdir.