Naxçıvan Muxtar Respublikası Təhsil Nazirliyinin və Maliyyə Nazirliyi yanında Maliyyə Tədris Mərkəzinin təşkilatçılığı ilə “Büdcəmizi anlayaq” layihəsi çərçivəsində növbəti təlim Naxçıvan şəhərindəki 1 nömrəli tam orta məktəbdə keçirilib.

60-dan çox məktəblinin iştirak etdiyi tədbirdə iştirakçılara təlimin mahiyyəti və aktuallığı barədə məlumat verilib, interaktiv oyun vasitəsi ilə şərti ailənin gəlir və xərclərinin müqayisəli təhlili aparılıb.

IX-XI sinif şagirdləri arasında məktəblilərin muxtar respublika fənn olimpiadasının şəhər və rayon mərhələsi olub. Olimpiadada 629 şagird iştirak edib.

Şagirdlər Azərbaycan dili və ədəbiyyat, riyaziyyat, fizika, kimya, biologiya,  informatika, tarix və coğrafiya fənləri üzrə biliklərini sınayıblar. Onlara hər fənn üzrə 20-30 sual təqdim olunub və  cavablandırmaq üçün şagirdlərə 3 saat vaxt verilib. Şəhər və rayon mərhələsinin nəticələrinə əsasən, hər fənn üzrə hər sinifdən ən yüksək bal toplayan 3 şagird  muxtar respublika mərhələsinin yekun turuna vəsiqə qazanacaq.

Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən muxtar respublikanın dövlət ümumtəhsil müəssisələrində psixoloq, laborant, kitabxana müdiri, kitabxanaçı, tərbiyəçi və uşaq birliyi təşkilatının rəhbəri vəzifələrinə işə qəbul üçün 4 sentyabr 2019-cu il tarixdə elan edilmiş müsabiqənin test imtahanlarına başlanılıb. Müsabiqəyə çıxarılan 148 vakant vəzifənin tutulması üçün 225 namizəd sənəd təqdim edib. Test imtahanında iştirakçılara 80 sual təqdim olunub, sualları cavablandırmaq üçün 120 dəqiqə vaxt verilib.

Təhsil müəssisələrində kitabxanaların fəaliyyətinin gücləndirilməsi, yaradılan əlverişli şəraitdən səmərəli istifadənin təşkili, şagirdlərdə mütaliə mədəniyyətinin formalaşdırılması məqsədilə 31 oktyabr 2019-cu il tarixdə Naxçıvan Muxtar Respublikası Təhsil Nazirliyinin və Kəngərli Rayon Təhsil Şöbəsinin birgə təşkilatçılığı ilə Xok kənd tam orta məktəbində ümumtəhsil məktəblərində kitabxana işinin təşkilinə həsr edilmiş seminar keçirilib. Məktəb kitabxanaçılarının, tərbiyə işləri üzrə direktor müavinlərinin və uşaq birliyi təşkilat rəhbərlərinin iştirakı ilə keçirilən seminarı giriş sözü ilə Kəngərli Rayon Təhsil Şöbəsinin müdiri Emin Məmmədxanlı açaraq muxtar respublikamızda təhsilin inkişafı istiqamətində həyata keçirilən tədbirlərdən danışıb.