26 yanvar 2021-ci il tarixdə Naxçıvan Muxtar Respublikası Təhsil Nazirliyinin təşkilatçılığı ilə Heydər Əliyev Uşaq-Gənclər Yaradıcılıq Mərkəzində “Xətt izləyən robot” müsabiqəsi keçirilib.

Müsabiqəni Təhsil nazirinin müavini Heyran Əhmədova açaraq muxtar respublikada təhsilin inkişafı istiqamətində atılan addımlardan, bu sahəyə göstərilən diqqət və qayğıdan danışıb. Heyran Əhmədova bildirib ki, ümumtəhsil məktəbləri ilə yanaşı məktəbdənkənar təhsil müəssisələrində də uşaqların yaradıcı bacarıqlarını inkişaf etdirmələri və sağlam böyümələri üçün hər cür şərait yaradılmışdır.

Sədərək Rayon Təhsil Şöbəsi tərəfindən test sınaq imtahanlarında yüksək nəticə göstərmiş şagirdlər və fənn olimpiadasının qalibləri ilə onlayn görüş keçirilib. Görüşdə Təhsil Şöbəsinin əməkdaşları, ümumtəhsil məktəblərinin direktorları və yüksək nəticə göstərmiş  şagirdlər iştirak edib.

22 yanvar 2021-ci il tarixdən başlayaraq Naxçıvan Muxtar Respublikası Təhsil Nazirliyi və Şahmat Federasiyasının birgə hazırladığı Tədbirlər Planına uyğun olaraq Kəngərli rayon ümumtəhsil məktəblərinin 8, 10, 12, 14 və 16 yaşlı oğlan və qız şagirdləri arasında məktəbdaxili şahmat yarışlarına start verilib.

Yarışın təşkilində əsas məqsəd ümumtəhsil məktəblərində təhsil alan şagirdlər arasında şahmata marağı artırmaq, onların bacarıqlarını üzə çıxarmaq, şahmat oyununu daha da kütləviləşdirmək və şagirdlərin asudə vaxtlarının səmərəli keçməsini təmin etməkdən ibarətdir. Eyni zamanda yarışın keçirilməsi nəticəsində ümumtəhsil məktəblərinin idman sahəsində sinifdənxaric və məktəbdənkənar fəaliyyətlərinin qiymətləndirilməsi, yüksək nailiyyət və uğurların qazanılması da əsas məqsədlərdəndir.

Sədərək  Rayon Təhsil Şöbəsi və  Polis Şöbəsnin birgə təşkilatçılığı ilə Heydərabad qəsəbə tam orta məktəbində “Zərərli vərdişlərə yox deyək” mövzusunda şagirdlərlə görüş keçirilib.

Görüşün təşkil edilməsində məqsəd şagirdlərin zərərli vərdişlərdən uzaq olmaları və sosial şəbəkələrdən düzgün istifadə etmələri barədə maarifləndirməkdən ibarət olub. Görüşün təşkilatçıları məktəblilərə mövzu haqqında danışaraq, zərərli vərdişlərin insanın fiziki sağlamlığına və psixologiyasına vurduğu zərərlər, cəmiyyətdəki münasibətlərdə yaratdığı problemlər barədə məlumat vermiş, onları yaxşı vərdişlər qazanmağa və öz sağlamlıqlarının qeydinə qalmağa səsləmişlər.

Görüşdə şagirdləri maraqlandıran suallar cavablandırılıb.