Heydər Əliyev Muzeyində 3 dekabr 2020-ci il tarixdə Naxçıvan şəhər 9 nömrəli tam orta məktəbin 15 şagirdinin iştirakı ilə növbəti açıq dərs keçirilmişdir. Muzeyin əməkdaşı Məhərrəmova Əfsanə tərəfindən “Bayrağımız istiqlaliyyət salnaməmizdir” mövzusunda keçirilən açıq dərsdə bildirilmişdir ki, hər bir millətin bayrağı onun milli kimliyinin dilinin mədəniyyətinin, dini əxlaqının, bir sözlə onun milli idealogiyasının ifadəsidir.

Sədərək kənd 2 nömrəli tam orta məktəbin VII sinfində Coğrafiya fənnindən “Xarici amillərin relyefə təsiri” mövzusunda açıq dərs keçirilib.

Məktəbin Coğrafiya müəllimi Elman Dünyamalıyev tərəfindən keçirilən dərsdə şagirdlərə relyef formalarının xarici təsirlər nəticəsində aşınması haqqında məlumat verilərək bildirilib ki, endogen qüvvələrin təsiri ilə yaranan relyef formaları zaman keçdikcə xarici qüvvələrin - temperaturun, küləyin, səth və yeraltı suların, buzlaqların və s. təsirinə məruz qalaraq parçalanır. Onların fəaliyyətinə ekzogen proseslər deyilir. Ekzogen proseslər nəticəsində süxurlar aşınır.

"3 dekabr-Beynəlxalq Əlillər Günü" münasibətilə Heydər Əliyev Uşaq-Gənclər Yaradıcılıq Mərkəzinin kollektivi Məhdud Fiziki İmkanlılar üçün Naxçıvan Regional İnformasiya Mərkəzində sağlamlıq imkanları məhdud uşaqlarla görüşüblər.

Mərkəzin fəaliyyəti ilə tanış olan kollektivə məlumat verilib ki, burada fəaliyyət göstərən defektoloji bölmə, təlim-bərpa, psixoloji dəstək, kinect oyunları, kompüter otaqları, əmək və musiqi terapiyası kabinələrində uşaqlara təyinatına uyğun bütün xidmətlər göstərilir. Eyni zamanda hərəkət qabiliyyəti məhdud uşaqların təhsil alması üçün distant tədris mərkəzi  mövcuddur.

Sonra gətirilən hədiyyələr uşaqlara təqdim olunub.

Naxçıvan Muxtar Respublikası Təhsil Nazirliyi və Azərbaycan Respublikası Dövlət İmtahan Mərkəzi Publik Hüquqi Şəxsin Naxçıvan Muxtar Respublikası Regional Bölməsinin təşkilatçılığı ilə noyabrın 30-da Şəhər və Rayon Təhsil şöbələrinin və təhsil müəssisələrinin “Şagird-məzun” informasiya sisteminin əlaqələndiriciləri üçün onlayn seminar keçirilib.

Seminarda regional Bölmənin əməkdaşı Səməndər Nəsirov 2021-ci ildə tətbiqi nəzərdə tutulan ümumi təhsil pilləsində təhsilalanların yekun qiymətləndirilməsi (buraxılış) imtahanlarının və ali təhsil müəssisələrinə qəbul imtahanlarının modeli və “Nəzarətçilərin elektron qeydiyyatı” sistemindən istifadə qaydaları haqqında məlumat verib.