Naxçıvan Muxtar Respublikasında Dövlət İmtahan Mərkəzi tərəfindən  19-20 avqust tarixlərində 2020/2021-ci tədris ili üçün ümumi orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisaslarına qəbul olmaq üçün qeydiyyatdan keçmiş abituriyentlərin qabiliyyət imtahanları keçiriləcək.

Bu gün muxtar respublikada II və III ixtisas qrupları üzrə ali təhsil müəssisələrinə növbəti qəbul imtahanı, həmçinin I və IV ixtisas qrupları üzrə ali təhsil müəssisələrinin müsabiqəsində buraxılış imtahanında verdiyi xarici dildən fərqli dil üzrə iştirak etmək istəyənlər üçün əlavə xarici dil imtahanı və qəbul imtahanını buraxılış imtahanında verdiyi dildən fərqli dil üzrə vermək istəyənlər üçün əlavə imtahan (Azərbaycan və ya rus dili) da keçirilib. Saat 11:00-da başlayan imtahan 3 saat davam edib.

Bu gün Gənclər Şəhərciyindəki basketbol meydançasında məktəblilərin yay tətilinin səmərəli təşkili məqsədilə oğlanlar arasında basketbol üzrə yoldaşlıq görüşü keçirilib. Görüşdə “Naxçıvan” - “Babək” komandaları qarşılaşıb.

Açılış mərasimində çıxış edən Naxçıvan Şəhər Təhsil Şöbəsinin əməkdaşı Şahmar Hüseynov görüşün keçirilmə məqsədi haqqında komandalara geniş məlumat verib və onlara qalibiyyət sevinci arzulayıb.

Bu gün Naxçıvan Şəhər Peşə Liseyində Naxçıvan şəhər ümumtəhsil məktəblərində təhsil alan sağlamlıq imkanları məhdud şagirdlərlə onlayn marifləndirici tədbir keçirilib. Tədbirin keçirilməsində məqsəd ümumtəhsil məktəblərinin yuxarı siniflərində təhsil alan sağlamlıq imkanları məhdud uşaqların bacarıq, imkan və maraqları nəzərə alınmaqla peşə təhsilinə cəlb edilməsi olub.