27 iyul 2020-ci il tarixdə Naxçıvan şəhər Uşaq Gənclər İdman Məktəbinin təşkilatçılığı ilə Gənclər şəhərciyinin mini futbol meydançasında basketbol idman növü üzrə “Topun çiləyərək səbətə salınması texnikası” mövzusunda məşğələ keçirilib. Açıq havada keçirilən məşğələdə 12 şagird iştirak edib. Məşğələnin keçirilməsində əsas məqsəd yeniyetmə və gənclərin bu idman növünə marağını artırmaq, cəldlik və çevikliyi inkişaf etdirmək, yay tətili dövründə şagirdlərin asudə vaxtlarını səmərəli təşkil etmək idi. Məşğələ zamanı basketbol oyununda topun sağ və sol əllə çilənmə texnikası, topu çiləyərkən ayaqlarda hərəkətlərin düzgün gedişatı və topu səbətə salarkən ayaqlarda təkan hərəkətlərinin düzgün yerinə yetirilməsi əyani şəkildə göstərilmiş və lazımi izahatlar verilib. Şagirdlər məşqləri yerinə yetirdikdən sonra buraxılmış səhvlər məşqçi tərəfindən izah olunub.
27 iyul 2020-ci il tarixdə Naxçıvan Muxtar Respublikası Təhsil Nazirliyinin təşkilatçılığı ilə Ekoloji Tərbiyə Mərkəzində dərnək üzvləri arasında muxtar respublikanın fauna və florasını dərindən öyrənmək məqsədilə “Doğma diyarımızın təbiəti” mövzusunda onlayn ekoloji viktorina keçirilib.
25 iyul 2020-ci il tarixdə Naxçıvan Muxtar Respublikası Təhsil Nazirliyinin təşkilatçılığı ilə məktəblilərdə təbiət hissi aşılamaq və onların ekoloji biliklərini artırmaq məqsədilə Ekoloji Tərbiyə Mərkəzinin dərnək üzvlərinin və dərək rəhbərlərinin iştirakı ilə “Bitkilərin təbiət və insan həyatında rolu” mövzusunda onlayn məşğələ keçirilib.
Naxçıvan Muxtar Respublikası Texniki Yaradıcılıq Mərkəzi dərnək üzvlərinin uşaqların yay tətili müddətində asudə vaxtlarının səmərəli təşkili məqsədilə “Oxunması zəruri olan kitablar” siyahısına daxil edilmiş kitabların müntəzəm olaraq mütaliəsini və müzakirəsini təşkil edir. 24 iyul 2020-ci il tarixdə Mərkəzin dərnək rəhbərləri və dərnək üzvlərinin iştirakı ilə Ernest Heminqueyin “Qoca və dəniz” povestinin müzakirəsi keçirilib. Müzakirədə mərkəzin dərnək rəhbəri Məhbubə Məmmədova bildirib ki, yazıçı əsərində insan və onun yaşamaq uğrunda mübarizəsini qələmə alıb. Bu baxımdan da insanın iradəsi və dözümündən bəhs edən “Qoca və dəniz” povesti həyatı tam mənası ilə əks etdirən yaradıcılıq nümunəsidir. Daha sonra povestin məzmunu və ideyası haqqında geniş məlumat verilib. Dərnək üzvləri povestin qəhrəmanları haqqında öz fikirlərini bildirib və şagirdləri maraqlandıran suallar cavablandırılıb.
Naxçıvan Muxtar Respublikasında təhsilin inkişafı prioritet istiqamət təşkil edir. Bu gün muxtar respublikamızda milli maarifçilik ənənələri saxlanılmaqla, dünya təhsil sisteminə inteqrasiya prosesi gedir. Muxtar respublikamızda təhsilin müasirləşdirilməsi və problemlərinin mərhələli həlli, müəllim kadrların hazırlığı, inkişaf etmiş dövlətlərin bu sahədəki təcrübəsinin mənimsənilməsi, ümumtəhsil məktəblərində kompüter və informasiya texnologiyalarının geniş tətbiqi məsələləri Naxçıvan Muxtar Respublikası Ali Məclisi Sədrinin diqqət mərkəzindədir.
