7 aprel bütün dünyada Sağlamlıq Günü kimi qeyd olunur. Bu tarix 1948-ci il aprelin 7-də BMT-nin xüsusi agentliyi kimi yaradılan Ümumdünya Səhiyyə Təşkilatının fəaliyyətə başlaması ilə əlaqədardır. “7 aprel – Ümumdünya Sağlamlıq Günü” ilə bağlı Naxçıvan Şəhər Təhsil Şöbəsinin tabeliyində olan ümumtəhsil məktəblərində “Sağlamlığımızı qoruyaq” mövzusunda maarifləndirici söhbətlər aparılmış, ibtidai və yuxarı siniflərdə 70 müəllim mövzu ilə bağlı olaraq 1250-dən artıq şagirdə geniş məlumat vermiş, slaydlardan, internet resurslarından istifadə edilərək açıq dərslər keçirilmiş, şagirdlərin bu mövzu ətrafında bilik və dünyagörüşünün artırılması təmin edilmişdir.

Naxçıvan Muxtar Respublikası Təhsil və Mədəniyyət nazirliklərinin birgə təşkilatçılığı ilə 6 aprel 2021-ci il tarixdə Naxçıvan Dövlət Xalça Muzeyində Naxçıvan Qızlar Liseyi, Naxçıvan şəhər  4, 5, 6 və 7 nömrəli tam orta məktəblər üzrə 15 şagirdin iştirakı ilə açıq dərs keçirilmişdir.

Naxçıvan şəhər 5 nömrəli tam orta məktəbin tarix müəllimi Şəhla Talıbova “Xalqımızın qədim ənənəsi-Xalçaçılıq” mövzusunda keçdiyi açıq dərsdə bildirmişdir ki, dünya mədəniyyəti içərisində yeri olan Azərbaycan xalçası özünün məxsusi ornamentləri ilə fərqlənən sənət nümunəsidir. Belə ki, Azərbaycan xalq tətbiqi sənəti və onun bir qolu olan xalçaçılıq xalqın milli mədəniyyəti tarixində özünəməxsus yer tutur.

Şagirdlərin formalaşmasında, mənəvi aləminin zənginləşməsində, dünyagörüşünün və bilik dairəsinin genişlənməsində, məntiqi təfəkkürünün, idraki bacarıqlarının inkişafında mütaliənin rolu nəzərə alınaraq aprel ayı muxtar respublikanın ümumtəhsil məktəblərində “Mütaliə aylığıˮ elan edilmişdir. Naxçıvan Muxtar Respublikası Təhsil Nazirliyinin “Mütaliə aylığıˮnın keçirilməsi ilə bağlı Tədbirlər Planına uyğun olaraq Şərur şəhər 2 nömrəli tam orta məktəbdə “Nizaminin hikmət və nəsihətləriˮ kitabının müzakirəsi keçirilib. Tədbirdə çıxış edənlər şairin həyatı haqqında qısa məlumat verərək qeyd ediblər ki, Nizami Gəncəvi ədəbi irsinin bu gün də dərindən öyrənilməsinə və məktəblilər arasında təbliğinə ehtiyac var. Şagirdlərə dahi şairin yazdığı poemaların və şeirlərin mütaliə edilməsinin vacibliyi tövsiyə edilmişdir.

Təhsil Nazirliyi tərəfindən təşkil edilən “Sabahın müəllimi” layihəsi çərçivəsində görülən işlərin davamı olaraq 6 aprel 2021-ci il tarixdə Naxçıvan şəhər 11, 12 və 14 nömrəli tam orta məktəblərdə təcrübəçi tələbələrə “Ümumtəhsil məktəblərində fənn kurikulumlarının tətbiqi və məktəbdaxili qiymətləndirmənin aparılması qaydaları” mövzusunda seminar keçirilmişdir.  Seminarda Naxçıvan Müəllimlər İnstitutunun tələbələri iştirak etmişdir.

Seminarda Təhsil Nazirliyi Aparatının Ümumtəhsil məktəbləri və liseylərlə iş üzrə şöbəsinin müdiri Abdulla Əsgərov təhsilə göstərilən dövlət qayğısından və məktəblərdə yaradılan imkanlardan bəhs etmişdir. Bildirmişdir ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 3 aprel 2019-cu il tarixli Sərəncamına uyğun olaraq pedaqoji profilli ixtisaslar Naxçıvan Muxtar Respublikası Təhsil Nazirliyinə hamiliyə verilmişdir. Hamiliyə verilmiş ixtisaslar üzrə müəllim kadrların hazırlanmasında ali təhsil müəssisələri ilə Təhsil Nazirliyi arasında sıx əlaqələr yaradılmış, 2019-cu ildən başlayaraq tələbələr üçün maarifləndirici seminarlar təşkil olunmuşdur.