Naxçıvan Muxtar Respublikasının Təhsil Nazirliyi və Rəssamlar Birliyinin birgə təşkilatçılığı ilə keçirilən məktəblilərin təsviri və dekorativ-tədbiqi sənət müsabiqəsi davam edir. 19 mart 2021-ci il tarixində Babək rayon ümumtəhsil məktəbləri arasında təsviri və dekorativ-tədbiqi sənət müsabiqəsinin rayon turu keçirilib. Rayon mərhələsində məktəbdaxili seçim mərhələsində fərqlənən 82 şagird 150 rəsm, toxuma, tikmə, ağac üzərində oyma və.s digər əl işləri ilə iştirak edib.

“Naxçıvan: dünən və bu gün”, “Naxçıvan abidələri”, “Müasir Naxçıvan”, “Muxtar respublikamızın füsünkar təbiətinin təsviri” və “Milli-mənəvi dəyərlərimiz və adət-ənənələrimizin təsviri” kimi mövzuların təqdim edildiyi müsabiqədə şagirdlər öz bacarıq və qabiliyyətlərini nümayiş etdiriblər.

Naxçıvan şəhər ümumtəhsil məktəblərində pedaqoji ixtisaslar üzrə təhsil alan təcrübəçi tələbələrin öyrəndikləri nəzəri biliklərin tətbiqi yolu ilə ixtisaslarını dərindən mənimsəmələri və peşəkar müəllim kimi inkişaf etmələrinə şərait yaratmaq məqsədilə “Sabahın müəllimi” layihəsi davam edir. Növbəti görüş 18 mart 2021-ci il tarixdə Naxçıvan şəhər 14 nömrəli tam orta məktəbdə Naxçıvan Müəllimlər İnstitutunun Riyaziyyat-informatika və İbtidai sinif müəllimliyi ixtisası üzrə təcrübədə olan tələbələrlə baş tutub.

Sədərək Rayon Təhsil Şöbəsi və Səfərbərlik və Hərbi Xidmətə Çağırış üzrə Dövlət Xidmətinin Sədərək Rayon Şöbəsinin birgə təşkilatçılığı ilə Çağırışaqədərki hazırlıq fənnindən açıq dərs keçirilib. Sədərək kənd 2 nömrəli tam orta məktəbdə təşkil edilən açıq dərs “Ak-74 kalaşnikov və Snayper silahlarının natamam sökülüb-yığılması” mövzusunda olub.

Məktəbin hərbi rəhbəri Murad Əliyev əvvəlcə mövzu və təhlükəsizlik qaydaları haqqında şagirdlərə geniş məlumat verib. Hər iki silahın sökülüb-yığılma qaydası şagirdlərə əyani şəkildə göstərilib. Müstəqil olaraq hər bir şagird təhlükəsizlik qaydalarına əməl etməklə normativə uyğun fəallıq yerinə yetiriblər.

Sədədərək Rayon Təhsil Şöbəsi, Şahmat Federasiyasının rayon bölməsi, Yevlax Şəhər Uşaq Gənclər İdman Şahmat Məkətəbi və İzmir Deha Satranc Mərkəzinin birgə təşkilatçılığı ilə Azərbaycan və Türkiyə şahmatçı şagirdləri arasında “Bir Millət İki Dövlət” devizi altında Yoldaşlıq görüşü keçirilib.

Görüşdə Azərbaycanın rayon və şəhərlərindən Yevlax, Göyçay, Ucar, Ağdaş, Samux, Oğuz, Tərtər, Balakən Uşaq Gənclər İdman Şahmat məktəbləri, Naxçıvan Muxtar Respublikasından Sədərək və Kəngərli Rayon Uşaq Gənclər Şahmat məktəbləri, Türkiyə Respublikasından isə İzmir Deha, Muğla, Ankara, Beyaz kale, Denizli, İsgenderum, Karşıyaka, Manisa, Sardes və Kırıkkale Satranc mərkəzləri və klubları olmaqla, ümumilikdə 20 komanda iştirak edib.